Memleket basshysy Qasym-Jomart Toqaev elordadaǵy «Travmatologiia jáne ortopediia ǵylymi-zertteý institýty» respýblikalyq memlekettik kásipornyna bardy, dep habarlaidy "Ult aqparat" Aqordaǵa silteme jasap.
QR Prezidenti ota jasaityn jáne reanimatsiia bólimderin aralap kórip, meditsinalyq mekemeniń ujymymen áńgimelesti.
Q.Toqaevqa institýt jumysynyń negizgi kórsetkishteri sondai-aq, meditsina mekemesiniń ǵylymi-zertteý jobalary tanystyryldy.
Travmatologiia jáne ortopediia ǵylymi-zertteý institýty – meditsinanyń atalǵan salasy boiynsha ozyq tehnologiialardy ázirleýmen, jetildirýmen jáne engizýmen ainalysatyn Qazaqstandaǵy birden-bir ǵylymi-klinikalyq, bilim berý ortalyǵy. Munda kún saiyn 50-den astam, al bir jylda 8 myńnan asa ota jasalady. Búginde meditsinalyq ortalyqta 385 emdelýshige arnalǵan 14 klinikalyq bólimshe jumys isteidi. Osy bólimshelerdiń negizinde býyndarǵa endoprotez jasaý, artroskopiia jáne sporttyq jaraqattardy emdeý, omyrtqa patologiiasyn túzetý siiaqty 3 respýblikalyq ortalyq ashylǵan.
Mekeme qyzmetkerlerimen kezdesý barysynda Memleket basshysy ǵylymi-zertteý institýty janynan qosymsha 23,2 myń sharshy metrlik meditsinalyq korpýs salýǵa sheshim qabyldaǵanyn aitty. Prezidenttiń pikirinshe, ǵylymi-zertteý institýtynyń eskirgen ǵimarattary zaman talabyna sai kelmeidi.
«2021 jyly bul jerde jańa ǵimarat boi kóteredi. Tiisti qarajat bólinedi. Qurylys jumystaryna 26 milliard teńge qajet. Munyń qomaqty soma bolǵanyna qaramastan, Úkimetke tiisti tapsyrma beremin», – dedi Qasym-Jomart Toqaev.
Jańa korpýsta ota jasaityn 6 zal, 300 oryndyq ońaltý ortalyǵy, oqý bólimderi sondai-aq, meditsinalyq buiymdar shyǵaratyn shaǵyn zaýyt bolady. Ǵimarat paidalanýǵa berilgennen keiin joǵary tehnologiialyq meditsinalyq qyzmet kórsetý kólemi 45 paiyzǵa artady.
Institýt ujymy Prezidentke memleket tarapynan kórsetilip jatqan qoldaý úshin alǵys aitty. Memleket basshysy meditsina qyzmetkerleriniń igilikti eńbegin joǵary baǵalap, olarǵa tabys tiledi.
