Memleket basshysy Ózbekstannyń Syrtqy ister ministri Bahtiior Saidovty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Prezident Qasym-Jomart Toqaev Ózbekstannyń syrtqy saiasat vedomstvosynyń basshysyna iltipat bildire otyryp, qazaq-ózbek yntymaqtastyǵy barlyq salada qarqyndy damyp kele jatqanyn atap ótti.
Onyń aitýynsha, Qazaqstan baýyrlas Ózbekstanmen ózara qarym-qatynasty odan ári nyǵaitýǵa basa mán beredi.
Qasym-Jomart Toqaev Shavkat Mirziioevtiń ekijaqty bailanystardy tereńdetý isine eleýli úles qosyp otyrǵanyna toqtalyp, Qazaqstan óńir halyqtarynyń igiligi men ósip-órkendeýine baǵyttalǵan Ózbekstannyń bastamalaryn aldaǵy ýaqytta da qoldaýǵa daiyn ekenin jetkizdi.
Kezdesý barysynda saýda-ekonomikalyq yqpaldastyqty keńeitý máseleleri talqylandy. Eki eldiń damýyna tyń serpin beretin jańa baǵyttardy qarastyrý jáne ekijaqty taýar ainalymyn arttyrý mańyzdy ekeni aityldy.
Memleket basshysy kólik-tranzit salasyndaǵy yntymaqtastyqty nyǵaitýdyń máni zor ekenin atap ótti. Prezident Qazaqstannyń «Darbaza – Maqtaaral» temirjol jelisin salýǵa kiriskenin málimdedi. Bul joldy odan ári Ózbekstan shekarasyna jetkizý kózdelip otyr. Atalǵan temirjol bailanysy eki el arasyndaǵy júk tasymalynyń kólemin ulǵaitýǵa múmkindik beredi. Qasym-Jomart Toqaev Ózbekstan tarapynyń Transkaspii halyqaralyq kólik baǵdaryn damytý isine atsalysýy barlyq tarapqa tiimdi bolady dep sanaidy.
Óz kezeginde Bahtiior Saidov qurmet kórsetkeni úshin Memleket basshysyna alǵys aityp, Ózbekstan Prezidentiniń izgi tilegin jetkizdi.
Ministrdiń aitýynsha, eki el basshylary Qazaqstan men Ózbekstan arasyndaǵy odaqtastyq qarym-qatynasty nyǵaitý úshin joǵary meje qoiyp otyr. Osyǵan orai Bahtiior Saidov buǵan deiin joǵary deńgeide qol jetkizilgen ýaǵdalastyqtardy sapaly júzege asyrý jónindegi birlesken jumys josparyn baiandady.
Sonymen qatar kezdesý barysynda sý sharýashylyǵy salasyndaǵy yntymaqtastyq jáne Ortalyq Aziiadaǵy óńirlik qaýipsizdikti qamtamasyz etý máseleleri talqylandy.
Budan bólek, aldaǵy ýaqytqa josparlanǵan ekijaqty jáne kópjaqty sipattaǵy kezdesýler men is-sharalar kestesi qarastyryldy.
