Qazaqstan Prezidenti Qasym-Jomart Toqaev Qazaqstan mashina jasaýshylarynyń VII forýmyna qatysýshylarynyń jumysyna sáttilik tilep, quttyqtaý hat joldady.
Memleket basshysynyń hatyn elordadaǵy forým barysynda kómekshisi Máýlen Áshimbaev oqyp berdi, dep habarlaidy QazAqparat tilshisi.
«Qazirgi ýaqytta mashina jasaý salasy, qosalqy bólshekter men quraýshylar óndirisinen bastap, ónimniń túpki túrlerin jasaýǵa kóshti: zamanaýi teplovozdar, elektrovozdar, jolaýshylar jáne júk vagondary, astyq jinaýshy kombaindar, avtobýstar, júk jáne jeńil avtokólikter, tranformatorlar men basqa da kúrdeli jabdyqtar. Bul sala álemdik ekonomikalyq ahýalǵa sátti beiimdelgen jáne Qazaqstannyń óndiristik damýynyń jarqyn mysaly. HHI ǵasyr tórtinshi ónerkásiptik revoliýtsiianyń bastaýymen erekshelenedi. Mashina jasaý Qazaqstannyń jetekshi salalarynyń biri retinde jahandyq úderisterimen úzeńgiles júretinine meniń senimim mol», - dedi Prezidenttiń quttyqtaý sózin oqyp bergen Máýlen Áshimbaev.
Óziniń quttyqtaý hatynda Prezident mashina jasaýshylar men memlekettiń birlesken umtylysy osy salanyń ekonomikany jańǵyrtýdyń draiveri bolýyna múmkindik beretinin atap ótti.
«Qazaqstan mashina jasaýshylarynyń VII forýmynyń qatysýshylaryna jemisti eńbek jáne alǵa qoiǵan maqsattaryna qol jetkizýde jetistikter tileimin», - delingen Memleket basshysynyń quttyqtaý hatynda.
Eske sala ketsek, Nur-Sultanda Qazaqstan mashina jasaýshylarynyń VII forýmy ótip jatyr. Forýmdy QR Indýstriia jáne infraqurylymdyq damý ministrligi men Qazaqstan mashina jasaýshylar odaǵy, «Samuryq-Qazyna» UÁQ» AQ uiymdastyrǵan. Biyl forým «Mashina jasaý – Qazaqstandy indýstriialandyrý draiveri» uranymen ótedi.
Jyl saiyn forýmǵa Germaniia, AQSh, Japoniia, Italiia, Chehiia, Resei, Qytai sekildi iri 20 memlekettiń delegattary qatysady. Osylaisha, otandyq kásiporyndar elden shyqpai-aq sheteldik áriptesterimen kezdesý ótkizýge múmkindik alady.
Aita keteiik, Nur-Sultanda Qazaqstan mashina jasaýshylarynyń VII forýmy ótip jatyr.
