Aldaǵy 3 jyldyń ishinde quqyq qorǵaý qurylymdary men armiiada qarjylyq tólemder ortasha 30 paiyzǵa artatyn bolady. Bul týraly Táýelsizdik kúni qarsańynda ótken Memlekettik nagradalardy tapsyrý rásiminde QR Prezidenti Qasym-Jomart Toqaev aitty, dep habarlaidy "Ult aqparat".
«Biylǵy jyldyń daǵdarysty jaǵdaiynda kúshtik qurylymdar qyzmeti tiimdiliginiń mańyzy kúrt artty. Karantindik is-sharalarǵa jumyldyrylǵan ishki ister organdarynyń qyzmetkerlerin yntalandyrý úshin 18 mlrd teńgeden astam bólindi. Aldaǵy 3 jyldyń ishinde quqyq qorǵaý qurylymdary men armiiada qarjylyq tólemder ortasha 30 paiyzǵa artatyn bolady», - dedi Memleket basshysy.
QR Prezidenti eldegi qoǵamdyq turaqtylyq pen áleýmettik progress myqty ekonomikalyq negiz bolǵan kezde ǵana múmkin ekendigin basa aitty. Qatań shekteýler men karantinge qaramastan halyqtyń ekonomikalyq belsendiligi saqtalǵanyn, bizneske qalypty jumys isteýi úshin kómek kórsetilgenin atap ótti. Daǵdarysqa qarsy sharalar toptamasy aiasynda shaǵyn jáne orta biznes sýbektileri birqatar jeńildikter alǵanyn eske saldy.
«Jalpy qoldaý kólemi 1,5 trln teńgeden asyp tústi. Bul 8 trln teńgege ónim shyǵarý kólemin saqtap qalýǵa múmkindik berdi. 200 myńnan astam jumys orny qurylyp, otandyq kompaniialar shamamen 500 mlrd teńgege memlekettik tapsyrystar aldy. Osylaisha, 2025 jylǵa qarai shaǵyn jáne orta biznestiń jalpy ishki ónimdegi úlesi 35 paiyzǵa jetýi tiis», - dedi Qasym-Jomart Toqaev.
