Eýraziialyq ekonomikalyq odaqqa múshe memleketter óziniń tranzittik áleýetin tolyǵymen júzege asyra bilýi kerek. Joǵary Eýraziialyq ekonomikalyq keńestiń otyrysynda Prezident Qasym-Jomart Toqaev osylai aitty, dep habarlaidy QazAqparat.
«Taktikalyq qadamdar men bastamalar týraly da oilaný kerek. Osyǵan bailanysty kelesi máselelerge nazar aýdarýdy usynamyn: birinshiden, pandemiia kezeńinde ekonomikalyq odaqqa múshe memleketterdiń úkimetteriniń basty mindetteriniń biri – kásipkerlik belsendilikti jigerlendirý. Iri kásiporyndardan qaraǵanda shaǵyn jáne orta biznestiń ókilderinde kooperatsiia úshin jetkilikti múmkindik joq. Sonymen qatar biznestiń bul túri – halyqtyń basym bóligin jumyspen qamtityn bizdiń ekonomikalardyń negizgi elementi sanalady. Osyǵan bailanysty komissiiaǵa shaǵyn jáne orta biznes ókilderin integratsiialyq óndiristi jelige qatystyrarlyq sharalar keshenin ázirleýdi usynamyn», - dedi Qasym-Jomart Toqaev Joǵary Eýraziialyq ekonomikalyq keńestiń otyrysynda.
Prezident ekinshiden Qytai men Aziiadaǵy saýdanyń ósimi – Shyǵysty ekonomikalyq gravitatsiianyń ortalyǵyna ainaldyratyndyǵyn aitty.
«Aziia shynynda da HHI ǵasyrdyń aimaǵyna ainalýda. Búkil álemniń jalpy ishki óniminiń 28 paiyzy – osy Aziiada shoǵyrlanǵan. Bul san tek óse bermek. Qazirgi tańda Shyǵysqa moiyn burý trendi jańa múmkindikterge jol asha bastady. Biz – Eýraziialyq ekonomikalyq odaqqa múshe memleketterge ózimizdiń tranzittik áleýetimizdi tolyǵymen júzege asyra bilýimiz kerek. Transhekaralyq ýchaskelerdi jańǵyrtý jumysyna basa mán berýdi, Batys Eýropa – Batys Qytai avtojolynyń Resei aýmaǵyndaǵy qurylysyn aiaqtaýdy usynamyn. Sondai-aq taýarlardyń ishki qozǵalysyn qamtamasyz etý úshin kóliktik dálizderdi tsifrlandyrý jumysyn aiaqtaý kerek», - dedi ol.
