QR Prezidenti Qasym-Jomart Toqaev Ábý Dabidiń taq murageri, sheih Muhammed ben Zaid Ál Nahaianmen kelissóz júrgizdi, - dep habarlaidy Aqordanyń baspasóz qyzmeti.
Qazaqstan Prezidentin resmi qarsy alý rásimi «Ál-Ýatan» saraiynyń aldynda ótti. Qazaqstannyń týy kóterilip, eki memlekettiń ulttyq ánurandary oryndaldy.
Qasym-Jomart Toqaev pen sheih Muhammed Zaid Ál Nahaian bir-birine iltipat bildirgennen keiin Qurmetti qaraýyl rotasyn aralap ótti. Eki eldiń resmi delegatsiia músheleri tanystyrylǵannan keiin Memleket basshysy Qurmetti qonaqtar kitabyna qoltańba qaldyrdy.
Rásim sońynda Qazaqstan Prezidenti men Ábý Dabidiń taq murageri kelissóz júrgizdi. Taraptar ekijaqty qarym-qatynastardy jandandyrýǵa, ekonomikalyq seriktestikti keńeitýge basa nazar aýdardy.
– Sizdi Birikken Arab Ámirlikterinde kórgenime qýanyshtymyn. Ámirlikter Basshysynyń atynan Sizdiń saparyńyzǵa tabys tileimin. Sonymen qatar bizdiń jaqyn dosymyz Elbasy Nursultan Ábishuly Nazarbaevqa sálem joldaimyz. Qazirgi ýaqytta elderimiz arasyndaǵy ekijaqty qatynastar joǵary deńgeide damyp keledi. BAÁ Qazaqstanmen ózara yqpaldastyqty nyǵaitýǵa erekshe kóńil bóledi. Memleketterimiz arasyndaǵy yntymaqtastyq jan-jaqty damýda, – dep atap ótti Muhammed ben Zaid Ál Nahaian.
Memleket basshysy Sheih Muhammedke qonaqjailyq tanytqany úshin rizashylyq bildirip, Qazaqstan Prezidenti retinde óziniń alǵashqy saparyn arab álemine, sonyń ishinde Birikken Arab Ámirlikterine jasap otyrǵanyn atap ótti.
– Eki el arasyndaǵy qarym-qatynastar tarihynyń tamyry tereń. Bizdi shynaiy dostyq, ózara senim men túsinistik bailanystyrady. Sondyqtan qarym-qatynastarymyzdyń keleshegi zor. Meniń saparymnyń negizgi maqsaty – eki memlekettiń yntymaqtastyǵyna tyń serpin berý. Biz úlken jetistikterge qol jetkizdik, biraq bir orynda toqtap qalýǵa bolmaidy. Alǵa jyljýymyz kerek. Men osy saparǵa erekshe mán beremin jáne úlken úmitpen qaraimyn, – dedi Qasym-Jomart Toqaev.
Kezdesý barysynda munai-himiia, aýyl sharýashylyǵy, kólik-logistika, qarjy jáne investitsiia salalaryndaǵy ózara is-qimyldar men yntymaqtastyq máseleleri qarastyryldy.
Qasym-Jomart Toqaev eki memlekettiń de mańyzdy tarihi kezeń aldynda turǵanyn – kelesi jyly Ámirlikterdiń qurylǵanyna 50 jyl, Qazaqstannyń Táýelsizdik alǵanyna 30 jyl tolatynyn atap ótti.
Kezdesý sońynda taraptar qol qoiylǵan qujattarmen almasty. QR Energetika ministrligi men BAÁ Energetika jáne ónerkásip ministrligi arasynda munai-himiia ónerkásibi salasyndaǵy ózara túsinistik pen yntymaqtastyq týraly memorandýmǵa, QR Saýda jáne integratsiia ministrligi men BAÁ ekonomika ministrligi arasyndaǵy ózara túsinistik týraly memorandýmǵa, «Astana» halyqaralyq qarjy ortalyǵynyń Qarjylyq qyzmet kórsetýdi retteý jónindegi komiteti men BAÁ Ortalyq banki arasyndaǵy ózara túsinistik týraly memorandýmǵa qol qoiyldy.
