QR Premer-Ministri Asqar Mamin QR Prezidenti janyndaǵy Tsifrlandyrýdy engizý máseleleri jónindegi komissiia otyrysyn ótkizdi, dep habarlaidy "Ult aqparat" primeminister.kz saityna silteme jasap.
Aqparattyq-kommýnikatsiialyq tehnologiialar salasyn jáne tsifrlyq salany damytý tujyrymdamasy, «DigitEL» ulttyq jobasy, «Smart City» jobalaryn iske asyrý barysy týraly tsifrlyq damý, Innovatsiialar jáne aeroǵarysh ónerkásibi ministri Baǵdat Mýsin, meditsina salasyndaǵy jasandy zerdeni damytý týraly Densaýlyq saqtaý ministri Aleksei Tsoi, memlekettik organdardyń kadr júiesin tsifrlandyrý máseleleri týraly Memlekettik qyzmet isteri agenttiginiń tóraiymy Anar Jaiylǵanova baiandady. Qaýipsizdik jáne tirshilikti qamtamasyz etý salalaryndaǵy tsifrlyq jobalardy júzege asyratyn jeke kompaniialardyń ókilderi túsinikteme berdi.
«DigitEL» ulttyq jobasy (Digital Era Lifestyle) 5 baǵyt boiynsha 200-ge jýyq is-sharany qarastyrady. Jobany iske asyrý nátijesinde 2021-2025 jyldar kezeńinde halyqty sapaly internetpen jáne elektrondyq densaýlyq pasporttarymen 100% qamtý, AT salasyna investitsiialardy jylyna 500 mlrd teńgege deiin, AT ónimderi men qyzmetteri eksportynyń jalpy kólemin 500 mln dollarǵa deiin, elektrondyq ónerkásip óndirisiniń kólemin 90 mlrd teńgege deiin, 100 myń jańa jumys ornyn qurý, óńirlerde 5 AT-mektep ashý kózdelgen.
Densaýlyq saqtaýdy tsifrlandyrý sheńberinde jasandy zerdesi bar meditsinalyq beinelerdiń Ulttyq qoimasyn (PAKS júiesi) qurý josparlanýda. Bul onkologiialyq aýrýlar men ókpe aýrýlaryn ýaqtyly jáne sapaly diagnostikalaýdy qamtamasyz etýge, shalǵai óńirlerde bilikti dárigerlerdiń qoljetimdiligine táýeldilikti tómendetýge múmkindik beredi. Júieniń tiimdiligi Almaty jáne Atyraý oblystarynda synaldy — onkologiialyq aýrýlardy erte satysynda anyqtaý 25% artty, ólim-jitim 15% tómendedi.
Qazaqstan ekonomikasyn tsifrlandyrýdyń negizgi jobalarynyń biri óńirlerdegi turmys sapasyn jaqsartýǵa baǵyttalǵan «Smart City» bolyp tabylady. Jobany iske asyrý nátijesinde úsh jyl ishinde jol-kólik oqiǵalarynan ólim-jitim 2 esege, kommýnaldyq qyzmetterge jumsalatyn shyǵyndar 30% deiin, quqyq buzýshylyqtar sany 20% tómendedi. Qoǵamdyq kólikti tsifrlandyrý esebinen salyq jinaý 25-30% ósti.
QR «aqyldy qalalar» etalondyq standarty 11 baǵyttan turady jáne 100-den astam negizgi kórsetkish pen 100 bastamany qamtidy. 2020 jyldyń qorytyndysy boiynsha «Smart City» tujyrymdamasyn iske asyrý boiynsha kóshbasshylar Almaty, Nur-Sultan jáne Qaraǵandy qalalary boldy. Eń az ball jinaǵan qalalar – Taraz, Aqtaý jáne Pavlodar.
Otyrysqa qatysýshylar qalalyq keńistikti beinebaqylaý júielerimen, qoǵamdyq kólikte jol júrý aqysyn tóleýdiń elektrondyq júiesimen qamtýdy odan ári keńeitý, bilim berý, densaýlyq saqtaý, TKSh, áleýmettik jáne basqa da salalarǵa «aqyldy júielerdi» engizý máselelerin qarastyrdy. Premer-Ministr QR Prezidenti janyndaǵy Reformalar jónindegi joǵary keńestiń otyrysynda «DigitEL» ulttyq jobasyn tanystyrýdy, sondai-aq «aqyldy qalalar» etalondyq standartyn ózektendirýdi tapsyrdy.
