QR Premer-Ministri Asqar Maminniń tóraǵalyǵymen «Samuryq-Qazyna» Ulttyq ál-aýqat qory» AQ Direktorlar keńesiniń otyrysy ótti, dep habarlaidy "Ult aqparat" primeminister.kz saityna silteme jasap.
Otyrys barysynda jekeshelendirýdiń 2016–2020 jyldarǵa arnalǵan keshendi josparyn iske asyrý jáne túzetý máseleleri talqylandy. Qordyń táýekelderin basqarý saiasaty máseleleri boiynsha esepter tyńdalyp, ishki baqylaý júiesin odan ári jetildirý sharalary bekitildi. Sonymen qatar, Qordyń qaiyrymdylyq jumysynyń qorytyndysy shyǵarylyp, sondai-aq, birqatar protsedýralyq máseleleri sheshildi.
«Atyraý halyqaralyq áýejaiy» AQ, «Aqtóbe halyqaralyq áýejaiy» AQ, «Pavlodar áýejaiy» AQ tiisti oblys ortalyqtarynyń ákimdikteriniń kommýnaldyq menshikterine berý týraly sheshim qabyldandy. Atalǵan sheshim kólik qoljetimdiligi men halyq jumylǵyshtyǵyn qamtamasyz etýdi, sondai-aq óńirlerdi damytý úshin áýejailardyń áleýmettik mańyzyn eskere otyryp qabyldandy.
Qordyń Kompaniialar tobynyń negizgi qyzmetinen túsken kiristeri 2018 jyly 35%-ǵa ulǵaitylǵany atalyp ótti. Taza kiris kólemi 2017 jylǵy kórsetkishtermen salystyrǵanda 2 esege ósken. Oń óndiristik qarjylyq nátijeler Qorǵa densaýlyq saqtaý, salaýatty ómir salty, meditsina, bilim berý jáne qaiyrymdylyq salalarynda áleýmettik baǵdarlamalardy iske asyrýdy jalǵastyrýǵa jáne keńeitýge jol ashty.
Otyrys aiasynda Qordyń qaiyrymdylyq baǵdarlamasyn oryndaýdyń 2018 jylǵa arnalǵan Jyldyq esebi qaraldy. Qor atynan qaiyrymdylyq sharalaryn oryndaityn operator — Samruk-Kazyna Trust Korporativtik qory. 2018 jyly Korporativtik qor 250 000-nan astam adamdy qamti otyryp, 5,5 mlrd-tan astam teńgege 32 qaiyrymdylyq jobasyn qoldady. Baǵyttar kelesi sanattardy qamtidy: áleýmettik jáne meditsinalyq sektorlarda adamdarǵa, qoǵamdastyqtarǵa kómektesý, mediany, mádeni qaýymdastyqty, adam áleýetin damytý, eńbek qatynastaryn nyǵaitý, qoǵamnyń turaqty damýyna investitsiialar, sondai-aq, Qor toby bar óńirlerde áleýmettik investitsiialardyń óńirlik baǵdarlamalaryn iske asyrý.
