Áleýmettik jelilerde Qazaqstannyń jańa áskeri týy bekitilgeni týraly aqparat tarady. QR Qorǵanys ministrligi bul aqparattyń jalǵan ekenin málim etti, dep habarlaidy "Ult aqparat".
«Áleýmettik jelilerde jáne messendjerde qazaqstandyqtar «Qazaqstannyń jańa áskeri týy» bekitilgeni týraly habardy talqylaýda. Osyǵan bailanysty meniń uialy telefonyma ashynǵan azamattardan habarlamalar túse bastady. Bul jańalyqtyń jalǵan ekenin jariia etkim keledi», - dep jazdy Májilis depýtaty Baqytbek Smaǵul Facebook-tegi paraqshasynda.
Onyń aitýynsha, aqparattyń bastapqy kózi – «Panorama» basylymy.
«Birinshiden, «Prezident qurlyq áskerleri, áýe kúshteri jáne áskeri teńiz floty úshin biryńǵai áskeri týdyń dizainyn bekitti jáne ol eldiń barlyq áskeri bólimderi men oqý oryndarynda paida boldy» degen aqparattyń bastapqy qainar-kózi «Panorama» basylymy. Al ol ózin «satiralyq basylym» dep ataidy, iaǵni jazatyndary aqiqat aýylynan alys qonǵan ázil-qaljyńdar ǵana. Ekinshiden, áskeri bólimder men áskeri oqý oryndarynda jańa bairaq paida bolǵan joq, bárinde qoldanystaǵy týlary tur. Úshinshiden, Qorǵanys ministrligi basshylyǵymen de habarlastym, olar osy kúnderi eshqandai áskeri tý ózgertilmegenin rastady», - deidi ol.
Sondai-aq, bul aqparatqa qatysty QR Qorǵanys ministriligi Aqparat jáne kommýnikatsiia departamentiniń basshysy Daniiar Áljanov pikir bildirdi.
«Bul – feik, jalǵan aqparat. Ras aqparat ekendigi týraly eshqandai negiz joq», - deidi ol.
