Sot júiesinde eńbek sotyn qurý usynylady. Bul týraly QR Kásipodaqtar federatsiiasynyń tóraǵasy Satybaldy Dáýletalin málim etti, dep habarlaidy QazAqparat.
«Kásipodaqtar federatsiiasy jumyskerlerdiń quqyǵyn qorǵaityn birden bir uiym. Qazir bizdiń qatarymyzda eki millionǵa jýyq adam bar. Sondyqtan bul másele biz úshin óte mańyzdy, iaǵni eń negizgi baǵyttarymyzdyń biri. Azamattardyń quqyǵyn qorǵaýǵa toqtalsaq, bizderge kelip jatqan hattamalar men ótinishter qamtylyp otyr. 2020 jyldyń aiasynda 14 myńnan astam osyndai ótinish kelip tústi. Bul turǵyda negizgi máseleler eńbek quqyǵyn qorǵaý, iaǵni jalaqynyń ýaqytyly tólenbeýi, jumystan zańsyz bosatý problemalaryn qarastyrdyq», - dedi S. Dáýletalin QR Prezidenti janyndaǵy Adam quqyqtary jónindegi komissiia otyrysynyń aldynda tilshilerdiń saýalyna jaýap bere otyryp.
Onyń aitýynsha, atalǵan 14 myńnan astam ótinish boiynsha 85 paiyzy oń sheshimin tapty.
«Sonymen qatar bizde tatýlasý ortalyǵy bar. Sotqa jetkizbei mediatsiia arqyly osy máseleler sheshilip keledi. 2018 jyly medatsiia ortalyqtaryn búkil óńirde qurǵan edik», - dedi Kásipodaqtar federatsiiasynyń tóraǵasy.
Budan bólek ol búgingi otyrystaǵy usynystarǵa toqtaldy.
«Birinshiden, eńbek quqyqtaryna bailanysty júiede eńbek sotyn qurý usynylmaq. Shetelde bul qoldanys tapqan tájiribe. Eńbek daýlaryna toqtalsaq, olardyń barlyǵyna eńbek quqyǵyna bailanysty. Sondyqtan jekelegen túrde eńbek sotyn quryp, sol máselelerdi júieli túrde qarastyrýdy usynamyz», - dedi Satybaldy Dáýletalin.
