Qaraǵandy garnizonyndaǵy áskeri politsiia bóliminiń ofitseri aǵa leitenant Zańǵar Álkenov «Qaraǵandy-Jańaarqa» baǵyty boiynsha 200 shaqyrymdyq ýltramarafonda úzdik kórsetkishke jetti. Ol máreni 35 saǵat 11 minýt 52 sekýntta baǵyndyryp, QR Qarýly Kúshteri ofitserleriniń arasynda jańa rekord ornatty, dep habarlaidy "Ult aqparat" QR QM baspasóz qyzmetine silteme jasap.
Ofitser Qaraǵandy garnizony áskeri politsiia bóliminiń baqylaý- ótkizý pýnktinen bastady. 200 shaqyrymdy 48 saǵattyń ishinde eńserýdi josparlaǵan ol, marafondy belgilengen ýaqytynan buryn aiaqtady.
Marafon barysy júgirýshiniń baǵyty men ýaqytyn onlain rejiminde qadaǵalaýǵa bolatyn navigatsiialyq platformanyń kómegimen baqylandy.
Barlyq qashyqtyqta áskeri qyzmetshiniń janynda meditsinalyq mamandar men áskeri politsiia organdarynyń ókilderi júrdi.
«Marafonnyń birinshi kúni 100 shaqyrym qashyqtyqty júrip ótýdi josparladym, biraq ózimdi jaqsy kórsetkishke qol jetkizetinimdi sezinip 130 shaqyrym qashyqtyqty júrip óttim. Ekinshi kúnge 70 shaqyrym qashyqtyqty qaldyrdym. Eń qiyny sońǵy 20 shaqyrym boldy, alaida men ony jeńdim», - deidi Zańǵar Álkenov.
Márede ofitserdi týǵan-týystary men áriptesteri, sondai-aq Jańaarqa aýdanynyń turǵyndary qarsy aldy.
Aita ketý kerek, aǵa leitenant Zańǵar Álkenov – qazaq kúresinen Qazaqstan Respýblikasynyń sport sheberi, dziýdo men sambodan sport sheberine úmitker. Alǵash ret 15 shaqyrym qashyqtyqty, sodan keiin 21, 42, 75, 83 shaqyrym qashyqtyqty baǵyndyrǵan. Al qazirgi ýltramarafonǵa deiingi eń uzyn qashyqtyǵy 130 shaqyrym bolǵan.
Áskeri qyzmetshige 200 shaqyrymdyq ýltramarafondy baǵyndyrǵanyn dáleldeitin sertifikat pen tiisti qujattar rásimdelgennen keiin beriledi.
