Qazirgi tańda elimizde dári-dármekti zańsyz satýdyń 17 jaǵdaiy boiynsha sotqa deiingi tergeý amaldary júrgizilip jatyr, dep habarlaidy QazAqparat.
«Eń aldymen QR zańyn buza otyryp, dári-dármekti satýǵa baǵyttalǵan jedel sharalar týraly aita ketkim keledi. Atalǵan jumystyń barysynda halyqtyń dári-dármekke muqtajdyǵyn paidalanǵan dárihana qyzmetkerleri men jekelegen azamattardyń áreketine tosqaýyl qoiyldy. Qazir Qylmystyq kodekstiń 274-baby (zańsyz kásipkerlik) boiynsha 17 faktige qatysty sotqa deiingi tergeý amaldary bastaldy», - dedi OKQ-da ótken baspasóz máslihatynda Ishki ister vitse-ministri Aleksei Kalaichidi.
Ishki ister vitse-ministri búgin tańerteń Densaýlyq saqtaý ministri Aleksei Tsoi jariia etken faktilerdi rastady.
«Bul jumys jaýapty organdarmen birge kún saiyn kúsheitiledi. Óńirlerdiń bárinde de tiisti jedel shtabtar quryldy. Ol shtabtarda qajetti quzyretter men resýrstar bar. Sol sebepti dári-dármekti zańsyz satýǵa jol berilmeitinin aita otyryp, oǵan jol bergenderge quqyqtyq jaýapkershilik baryn eske salamyz. Moraldyq jaýapkershilikti de umytpaiyq», - dedi ol.
