QR DSM Taýarlar men qyzmetter qaýipsizdigi jáne sapasyn baqylaý komitetiniń tóraiymy Liýdmila Biýrabekova azyq-túlikterde anyqtalǵan buzýshylyqtar týraly aitty, dep habarlaidy QazAqparat.
Liýdmila Biýrabekovanyń aitýynsha, bul komitet osy jyldyń sáýir aiynda Qazaqstannyń Tuńǵysh Prezidenti Nursultan Nazarbaevtyń tapsyrmasyna sáikes qurylǵan. Komitet mindetteriniń biri - tamaq ónimderiniń qaýipsizdigi boiynsha jumys.
«Kún saiyn bizdiń barlyq aýmaqtyq departament qyzmetkerleri azyq-túlik sapasyna zertteýler júrgizedi. Ónimderge qoiylatyn talaptarǵa sáikes kelmeitin ónimderdi iriktep, taldaý jasaidy. Aǵymdaǵy jyldyń osy kezeńinde tamaq ónimderi men azyq-túlikke jatpaityn ónimderdiń 43 myń synamasy iriktelip alyndy jáne 19,6% jaǵdaida tehnikalyq reglamentter men gigienalyq normativterdiń talaptaryna sáikes kelmeýi anyqtaldy. Kóptegen buzýshylyqtar tańbalaý erejesinde anyqtaldy - 68,3%, qaýipsizdik talaptaryn saqtamaý - 12,4%, málimdelgen qasietterge nemese fizika-himiialyq parametrlerge sáikes kelmeý - 6,3% », - dedi ol.
Onyń málimeti boiynsha, aǵymdaǵy jyly anyqtalǵan buzýshylyqtarǵa 56 mln. teńgeden astam aiyppul salyndy, 38 myń tonna jaramsyz taýar ainalymnan alyndy.
«Sáikessizdikter men jalǵan ónimderdiń kópshiligi sút jáne mai ónimderinde kezdesedi. Tabiǵi ónimder dep kórsetedi de, alaida quramynda ósimdik maiy bar taǵamdardy satady», - dep tolyqtyrdy Liýdmila Biýrabekova.
Sondai-aq, ol bizdiń elde kontrafaktilik ónimder úshin qylmystyq jaýapkershilik qarastyrylmaǵanyn, biraq ákimshilik jaza qoldanylatynyn aitty.
Esterińizge salaiyq, Almatyda «Alimentariýs kodeksi» komissiiasynyń Eýropa boiynsha úilestirý komitetiniń 31-shi sessiiasy bastaldy. Oǵan Eýropanyń 38 elinen, AQSh, Afrika jáne Aziiadan eki júzge jýyq delegat qatysýda.
