QR Bilim jáne ǵylym ministrligi Aqtóbe qalasynda 15-20 naýryz aralyǵynda jaratylystaný-matematika baǵytyndaǵy pánder boiynsha respýblikalyq olimpiada ótkizedi, dep habarlaidy "Ult aqparat" ministrliktiń baspasóz qyzmetine silteme jasap.
«Bilim saiysynyń ashyq ári ádil ótýin qamtamasyz etý maqsatynda alǵash ret olimpiada onlain-rejimde kórsetiledi (edu.mail.kz). Iaǵni, kez kelgen adam olimpiadany virtýal túrde qadaǵalap, qazylar alqasynyń jaýaptardy tekserý kezindegi jumysyn nazarda ustai alady. Olimpiada Aqtóbe qalasyndaǵy «Nazarbaev Ziiatkerlik mektebinde» uiymdastyrylady», delingen habarlamada.
Bilim saiysynyń maqsaty - oqýshylardyń shyǵarmashylyq qabiletin damytý, teoriialyq bilim men praktikalyq daǵdylaryn tereńdetý. Jaratylystaný-matematika baǵytyndaǵy pánder boiynsha olimpiadaǵa 832 oqýshy qatysady. Onyń ishinde qurama komandadaǵy 83 bala - halyqaralyq olimpiadalardyń birneshe dúrkin jeńimpazy men júldegeri.
Qazaqstannyń barlyq óńirlerinen, Astana, Almaty jáne Shymkent qalalarynan, respýblikalyq bilim berý uiymdarynan, «Nazarbaev Ziiatkerlik mektepteri» derbes bilim berý uiymynan 19 komanda qatysady. Olimpiada jeńimpazdary men júldegerleri I, II, III dárejeli diplommen marapattalady.
