- Qazaqstan Respýblikasynyń Bas prokýratýrasy 2015 jyldyń aqpanynda Avstriiada qaza tapqan biznesmen, Qazaqstannyń arnaiy qyzmetiniń burynǵy basshysy Rahat Álievtiń ólimi týraly kýálikti aldy. Bul qujat Rahat Álievtiń ólimine bailanysty, oǵan qatysty qozǵalǵan qylmystyq isti toqtatý úshin tergeý organdaryna jóneltildi, dep habarlaidy Ult.kz tilshisi QazAqparat agenttigine silteme jasap.
Agenttik tilshisiniń resmi saýalyna jaýap bergen Bas prokýratýranyń málimetine súiensek, quzyrly organ Rahat Álievtiń ólimi jariialanǵan 2015 jyldyń 25 aqpanynan beri qylmystyq isti toqtatýǵa qajetti tiisti qujattardy suratqan. Avstriianyń tiisti organdaryna halyqaralyq tergeý buiryǵy jóneltilip, biznesmenniń ólimi týraly kýálik, sot-meditsinalyq saraptamalardyń qorytyndysy, hattamalar jáne ólikti anyqtaityn qujattar suratylǵan.
«Bas prokýratýra osy saýaldaryna jaýap retinde 2015 jyldyń 20 sáýirinde tek qana Rahat Álievtiń ólimi týraly kýáliktiń kóshirmesin ala aldy. 2016 jyldyń 13 aqpanynda Bas prokýratýra Avstriiaǵa taǵy da saýal joldady. Avstriia biligi ekinshi márte jóneltilgen suraýǵa 2016 jyldyń 30 maýsymynda jaýap bere otyryp, kýálikten basqa qujat bere almaityndaryn aitty. Sebebi, Rahat Álievtiń jesiri E.Shorazova 2015 jyldyń 18 maýsymynda Venanyń jer sotyna Rahat Álievtiń ólimine qatysty qujattardy Qazaqstan tarapyna bermeý týraly protest jiberip qoiǵan», - dep habarlady saýalymyzǵa jaýap bergen Bas prokýratýra.
Alaida, Vena soty Elnara Shorazovanyń ótinishin qabyldamady. 2016 jyldyń 21 qarashasynda Qazaqstannyń Bas prokýratýrasy diplomatiialyq kanaldardyń kómegimen Rahat Álievtiń ólimi týraly apostildi kýáliktiń, 2015 jyldyń 9 naýryzynda Shveitsariianyń Sankt-Gallen qalasyndaǵy Sot meditsina institýty júrgizgen sot-meditsinalyq saraptamalardyń kóshirmesin alǵan.
«Osy qujattar Rahat Álievtiń ólimine bailanysty, oǵan qatysty qozǵalǵan qylmystyq isti toqtatý úshin tergeý organdaryna jóneltildi»,- dep habarlady Bas prokýratýra.
