Búgin "Dáýlet" sport kesheninde QR dziýdo federatsiiasynyń prezidenti Qairat Qojamjarov dziýdodan el chempionatyn ashyq dep jariialady.
"Elimiz úshin óte mańyzdy kún. Sebebi Astananyń tórinde dziýdodan el chempionatyn ótkizip otyrmyz. Dziýdo – elimizde keń taralyp otyrǵan sport túri. Óitkeni sport pen dene shynyqtyrý Elbasymyz aitqan bastamalardyń biri. Kásibi sportta bizdiń jetistikterimiz elimizdiń jetistikterimen tepe-teń. Ártúrli alańdarda sonyń ózinde dúniejúzilik deńgeilerde bizdiń dziýdoshylarymyz jeńse ánuranymyz oinap, týymyz biikke kóteriletinin jaqsy bilesizder", - dedi Qojamjarov.
Federatsiia basshysy qazaqstandyq dziýdoshylardyń jetistikterin joǵary baǵalady.
"Aziia oiyndarynda, álem chempionatynda sonyń ishinde jastar men jasóspirimder arasynda kóptegen jetistik bar. Chempionattyń nátijesinde elimizdiń komandasy qurylatyn bolady. Kelesi Olimpiadaǵa óte az ýaqyt qaldy jáne álem deńgeiinde elimizdiń namysyn qoldan bermeitin ózderińiz bolasyzdar. Búgin naǵyz myqtylar men jeńimpazdar ulttyq qurama komandasyna kiredi. Sizderge árqashanda sáttilik tileimin. Týymyzdy biik ustap, abyroidy eshkimge bermeiik. Chempionatty ashyq dep jariialaýǵa ruqsat etińizder", - dep sózin túiindedi ol.
13-16 qarashada Astanadaǵy "Dáýlet" sport kesheninde elimizdiń barlyq óńirinen kelgen 400-ge jýyq sportshy ózara myqtyny anyqtaidy.
Eske sala ketsek, álem chempiony Maksim Rakov pen álem chempionatynyń kúmis júldegeri Azamat Muqanov ekeýi sporttyq karerasyn resmi túrde aiaqtaǵanyn málimdegen bolatyn.
