Qyrǵyzstannyń bas prokýratýrasy burynǵy prezident Almazbek Atambaevqa Koi-Tashtaǵy qaqtyǵysqa bailanysty aiyp taqty. Bul týraly bas prokýror Otkýrbek Jamshitov búgin, 13 tamyzda habarlady.
"Búgin Atambaevqa tártipsizdik uiymdastyrý, zańsyz qarý ainalymy, tergeýge kedergi keltirý, adamdardy kepilge alý, adam óltirý, adam óltirýge talpynys jasaý siiaqty jeti qylmystyq aiyp taǵyldy" dedi bas prokýror.
Jamshitovtyń sózinshe, Atambaev ustaý operatsiiasy kezinde arnaiy jasaq pen eks-prezident jaqtastary arasyndaǵy qaqtyǵysqa bailanysty birneshe qylmystyq is qozǵalyp, burynǵy prezidenttiń keibir jaqtastaryna da aiyp taǵylǵan. Bas prokýror olardyń tergeý izoliatoryna eki aiǵa qamalǵanyn aitty. Qamaýǵa alynǵandar arasynda Atambaevtyń burynǵy keńesshisi Farid Niiazov, Qyrǵyzstan sotsial-demokratiialyq partiiasynyń ókilderi Alga Kylychev, Kyiaz Ismailov, Amantýr Jamgyrchiev bar. Olardyń barlyǵy qazir Bishkek politsiiasynyń tergeý izoliatorynda otyr.
Atambaev 8 tamyzda jalǵasqan operatsiia kezinde óz erkimen bilikke berildi. Oǵan jemqorlyq aiyby taǵylyp, eks-prezident 26 tamyzǵa deiin qamaýǵa alyndy. Qazir onyń isi tergelip jatyr.
27 maýsymda Qyrǵyzstan parlamenti Almazbek Atambaevty eks-prezident jáne tiispeýshilik mártebesinen aiyrǵan. Keiin IIM Atambaevty tergeýge shaqyra bastady. Úsh ret shaqyrtý jibergenimen tergeýge barmaǵan Atambaevty ministrlik arnaiy operatsiia júrgizip, kúshtep ákelýdi tapsyrǵan.
Qyrǵyzstannyń burynǵy prezidentine qyzmette júrip jemqorlyqqa jol berdi, ókiletin asyra paidalandy jáne zańsyz baiydy degen siiaqty jalpy sany bes aiyp taǵylǵan. Prokýratýra Atambaev qylmystyq toptar arasynda tanymal Aziz Batýkaevtyń zańsyz bosatylýymen bailanysty iste kýáger retinde tanylǵanyn málimdegen.
Atambaev bul aiyptardyń bárin joqqa shyǵaryp, ózin tergeýge shaqyrýdyń saiasi astary bar dep málimdegen. Ol Aziz Batýkaevty bosatýǵa qatysy joǵyn da aitqan. Bishkek bul aiyptardyń saiasi astary bar degenmen kelispeidi.
Atambaev Qyrǵyzstandy 2011-2017 jyldary basqarǵan. Onyń ornyna bilikke 2017 jyldyń sońynda sailaý jolymen Sooronbai Jeenbekov kelgen.
