©baq.kz saitynan alynǵan sýret
Taǵdyryna tutas el alańdaǵan kishkentai Mádina Erlanqyzynyń janazasyna myńnan astam adam jinaldy, dep habarlaidy Qostanai oblysyndaǵy BAQ.KZ tilshisi.
Joǵalyp ketken búldirshindi tórt kún boiy izdeý jumystary bir sátte tolastamai júrse de, shynashaqtai Mádinany ajaldan eshkim arashalap qala almady. Bul sýyq habar búkil oblys úshin qaiǵyly oqiǵa boldy. Bir mezette 1500 adam balany izdeýge shyǵyp, sońyna deiin onyń tiri tabylatynyna sengen úmitteri aqtalmady. Estigen jannyń janaryna jas, kókiregine óksik tyǵyldy.
Nebári bes jasynda fániden baqiǵa attanǵan balanyń artynda etegi jasqa tolǵan ana men kókiregi qars aiyrylǵan ájesi, birge týǵandary qaldy. Aianyshty jaǵdaida kóz jumǵan Mádinanyń otbasyna oblys ákimi Arhimed Muhambetovtyń tapsyrmasy boiynsha jerleý rásimin uiymdastyrýǵa materialdyq kómek kórsetildi. Búgin, juma kúni kishkentai qyzdyń janazasy shyǵarylyp, denesi qara jer qoinyna tapsyryldy.
Marqummen qoshtasý Aimaǵanbet qajy Spanuly atyndaǵy oblystyq meshitte ótti. Mádinany sońǵy saparǵa shyǵaryp salýǵa kelgen qala turǵyndarynyń qarasy kóp boldy.
"Babalarymyz qyz balany nesibe deidi. Nesibeniń Allanyń aldynda saýaby bar. Er bala – nyǵmet. Nyǵmettiń Allanyń aldynda suraýy bar. Kishkentai Mádinamyzdy búgin sońǵy saparaǵa shyǵaryp, janaza namazyn oqymaqpyz. Qyzymyzdyń ákesi osydan bir jyl buryn qaitys bolypty. Endi ekeýi birigip artynda qalǵan týǵan týystaryna shapaǵatshy bolsyn. Bul kishkentai ǵana qyzymyz ómirden ótse de, ult pen ulysty biriktirip ketti", – dedi Bahytbek Nurǵabyluly.
Mádinanyń janazasy oqylǵan sátte kózine jas almaǵan halyq qalmady. Bir sátte tóńirek aza tutyp, ókinishtiń óksigi anyq estilip turdy. Kishkentai qyzben qoshtasýǵa kelgenderdiń arasynda balalar da boldy. Osylaisha kishkentai Mádina qyz ómirden ótse de, barlyq ult pen dindi biriktirip ketti. Ony biz janazadan anyq ańǵardyq.
