©baq.kz سايتىنان الىنعان سۋرەت
تاعدىرىنا تۇتاس ەل الاڭداعان كٸشكەنتاي مەدينا ەرلانقىزىنىڭ جانازاسىنا مىڭنان استام ادام جينالدى, دەپ حابارلايدى قوستاناي وبلىسىنداعى BAQ.KZ تٸلشٸسٸ.
جوعالىپ كەتكەن بٷلدٸرشٸندٸ تٶرت كٷن بويى ٸزدەۋ جۇمىستارى بٸر سەتتە تولاستاماي جٷرسە دە, شىناشاقتاي مەدينانى اجالدان ەشكٸم اراشالاپ قالا المادى. بۇل سۋىق حابار بٷكٸل وبلىس ٷشٸن قايعىلى وقيعا بولدى. بٸر مەزەتتە 1500 ادام بالانى ٸزدەۋگە شىعىپ, سوڭىنا دەيٸن ونىڭ تٸرٸ تابىلاتىنىنا سەنگەن ٷمٸتتەرٸ اقتالمادى. ەستٸگەن جاننىڭ جانارىنا جاس, كٶكٸرەگٸنە ٶكسٸك تىعىلدى.
نەبەرٸ بەس جاسىندا فەنيدەن باقيعا اتتانعان بالانىڭ ارتىندا ەتەگٸ جاسقا تولعان انا مەن كٶكٸرەگٸ قارس ايىرىلعان ەجەسٸ, بٸرگە تۋعاندارى قالدى. ايانىشتى جاعدايدا كٶز جۇمعان مەدينانىڭ وتباسىنا وبلىس ەكٸمٸ ارحيمەد مۇحامبەتوۆتىڭ تاپسىرماسى بويىنشا جەرلەۋ رەسٸمٸن ۇيىمداستىرۋعا ماتەريالدىق كٶمەك كٶرسەتٸلدٸ. بٷگٸن, جۇما كٷنٸ كٸشكەنتاي قىزدىڭ جانازاسى شىعارىلىپ, دەنەسٸ قارا جەر قوينىنا تاپسىرىلدى.
مارقۇممەن قوشتاسۋ ايماعانبەت قاجى سپانۇلى اتىنداعى وبلىستىق مەشٸتتە ٶتتٸ. مەدينانى سوڭعى ساپارعا شىعارىپ سالۋعا كەلگەن قالا تۇرعىندارىنىڭ قاراسى كٶپ بولدى.
"بابالارىمىز قىز بالانى نەسٸبە دەيدٸ. نەسٸبەنٸڭ اللانىڭ الدىندا ساۋابى بار. ەر بالا – نىعمەت. نىعمەتتٸڭ اللانىڭ الدىندا سۇراۋى بار. كٸشكەنتاي مەدينامىزدى بٷگٸن سوڭعى ساپاراعا شىعارىپ, جانازا نامازىن وقىماقپىز. قىزىمىزدىڭ ەكەسٸ وسىدان بٸر جىل بۇرىن قايتىس بولىپتى. ەندٸ ەكەۋٸ بٸرٸگٸپ ارتىندا قالعان تۋعان تۋىستارىنا شاپاعاتشى بولسىن. بۇل كٸشكەنتاي عانا قىزىمىز ٶمٸردەن ٶتسە دە, ۇلت پەن ۇلىستى بٸرٸكتٸرٸپ كەتتٸ", – دەدٸ باحىتبەك نۇرعابىلۇلى.
مەدينانىڭ جانازاسى وقىلعان سەتتە كٶزٸنە جاس الماعان حالىق قالمادى. بٸر سەتتە تٶڭٸرەك ازا تۇتىپ, ٶكٸنٸشتٸڭ ٶكسٸگٸ انىق ەستٸلٸپ تۇردى. كٸشكەنتاي قىزبەن قوشتاسۋعا كەلگەندەردٸڭ اراسىندا بالالار دا بولدى. وسىلايشا كٸشكەنتاي مەدينا قىز ٶمٸردەن ٶتسە دە, بارلىق ۇلت پەن دٸندٸ بٸرٸكتٸرٸپ كەتتٸ. ونى بٸز جانازادان انىق اڭعاردىق.
