Qostanaidaǵy «Saryarqa AvtoProm» zaýyty biyl 50 avtokólikti naryqqa shyǵarmaq. Osylaisha óndiris aýqymy birneshe ese kóbeiedi, dep habarlaidy QazAqparat.
Kásiporynda byltyr 26 myńǵa jýyq kólik qurastyrylǵan. Bul 2018 jylǵy kórsetkishten eki ese kóp. «Saryarqa AvtoProm» zaýytynyń direktory Syrym Semeibaevtyń aitýynsha, otandyq kólikterge degen suranystyń ósýi el ekonomikasyn damytýǵa septigin tigizedi.
«Qostanaidaǵy zaýyttan álemdik brend sanalatyn kólikterdiń jeti túri shyǵarylady. Alǵashqy ashylǵanda tek daiyn bólshekter qurastyrylatyn. Búginde jumys dánekerleý men syrlaýdan bastalady. Iaǵni, ónimniń otandyq úlesi artqan. Sonymen qatar óndiris aýqymy da eselep ósýde. Mysaly biyl jeliden shyǵatyn kólik sanyn 50 myńǵa deiin jetkizý josparlanyp otyr. Óndiristiń artýy tikelei suranysqa bailanysty. Al suranystyń ósý sebebi memlekettiń otandyq kólikti satyp alýshylarǵa jeńildetilgen nesie berýinde. Servistik qyzmet jolǵa qoiylǵan. Óndiris artqan saiyn ónimniń ózindik quny da tómendei beredi», - deidi zaýyt basshysy.
Dáýlet Nysanbaevtyń osy kásiporynnda jumys istegenine 6 jyl. Bastapqyda ózge de jergilikti mamandarmen birge Qytaidaǵy zaýytqa baryp tájiribe jinap qaitqan. Qazir kánigi sheberlerdiń biri. Ol basqaratyn dánekerleý tsehynda táýligine 16 kóliktiń kabinasy qurastyrylady.
«Bizde jalpy óndiris bóliminde 1300 adam eńbek etedi. Zaýyt olarǵa tek jalaqy tóleýmen shektelmei áleýmettik jaǵynan da jan-jaqty qoldaý kórsetedi. Qala boiynsha tegin avtobýs júredi. Ashanada tegin túski as beriledi. Kópbalaly otbasylarǵa mektepke qajettilikterge kómektesedi. Jańa sport zaly salyndy. Tennisten, fýtboldan týrnirler ótedi. Bulardyń bári bizge jaqsy kómek», - dedi Dáýlet Nysanbaev.
Sonymen, otandyq kólikke degen suranys ishki, syrtqy naryqta básekelestikke tótep berip, avtomobil óndirisiniń alǵa basýyna múmkindik berip otyr. Al óndiristiń damýy myńdaǵan jumys oryndary ashylyp, aldymen eldiń áleýmettik ahýalyn túzeýge sep bolary anyq.
Qazaqstan avtobiznes qaýymdastyǵynyń baspasóz qyzmetiniń habarlaýynsha, 2020 jyldyń qańtaryndaǵy jaǵdaida Qazaqstanda óndiris kólemi ótken jylǵy kórsetkishpen salystyrǵanda 81,9% ulǵaiyp, qarjy túrindegi kórsetkishi 71% -ǵa, iaǵni 35,845 mln teńgege deiin ósken.
«Ótken jyly avtomobil óndirýshiler óndiristi eki ese arttyrdy. Sonymen birge, jeńil avtomobil jasaý salasynyń elimizdegi mashina jasaý qurylymyndaǵy úlesi 38% -ǵa joǵarylady. Biz ósý kórsetkishi biyl da kútiledi. Biraq onyń qalai ósetini aldaǵy satylý naryǵyna bailanysty aiqyndalady», - deidi Qazaqstan avtobiznes qaýymdastyǵynyń vitse-prezidenti Anar Maqasheva.
