Qostanai oblystyq máslihatynyń kezekten tys sessiiasynda onomastika máseleleri qaraldy, dep habarlaidy "Ult aqparat" oblys ákiminiń baspasóz qyzmetine silteme jasap.
Máslihattyń kezekten tys sessiiasynda oblystyq tilderdi damytý basqarmasynyń basshysy Gúljan Mendekinova onomastika máseleleri boiynsha baiandama jasady.
Onyń aitýynsha, QR Parlamenti Májilisiniń bir top depýtaty jáne oblystyń ziialy qaýym ókilderi Qostanai qalasyndaǵy Vasilii Chekmarev atyndaǵy kóshege kórnekti qoǵam qairatkeri Oral Muhamedjanovtyń esimin berý jóninde Qostanai qalasy ákimdigine usynym hat joldaǵan.
«Bul másele 14 qarashada ótken Qostanai qalasy máslihatynyń turaqty depýtattary komissiiasynyń birlesken otyrysynda qaraldy. Kósheni qaita ataý týraly qala ákimdiginiń usynymy QR Úkimeti janyndaǵy respýblikalyq onomastikalyq komissiianyń otyrysynda qaralyp, tolyqtai qoldaý tapty. Oblys ákimdiginiń birlesken qaýlysymen oblystyq máslihattyń sheshimi jobasyna múddeli organdardyń jáne Ádilet departamenti kelisimderin alý boiynsha barlyq protsedýralar júzege asyryldy», – dedi oblystyq Gúljan Mendekinova.
Sonymen qatar basqarma basshysy Fedorov aýdanyndaǵy Dimitrov atyndaǵy №1 orta mektepke Abai Qunanbaevtyń atyn, №2 orta mektepke Ybyrai Altynsarinniń esimin berý usynystaryn jariia etti. Máslihat depýttattary atalǵan usynystardy biraýyzdan qoldady.
