Qostanai oblysy Qarasý aýdanynyń turǵyny balasynyń emine kómek kórsetken tártip saqshysyna alǵys aitty, dep habarlaidy "Ult aqparat" oblystyq Politsiia departamentiniń baspasóz qyzmetine silteme jasap.
Qarasý aýdandyq politsiia bólimine jergilikti turǵyn Tatiana Alpysbaeva kelip, ýchaskelik inspektor Baqytbek Hamidýllinge alǵysyn bildirdi. Tártip saqshysy birneshe jyl boiy zeinetkerdiń otbasyna kómektesip kelgen. 70 jastaǵy zeinetker 45 jastaǵy jumyssyz ulymen birge turady. Alaida balasy jii ishimdik iship, urys shyǵarady. Anasy osyndai sátte birden ýchaskelik politsiia qyzmetkerin shaqyrady.
«Zeinetker politsiia kapitany Baqytbek Hamidýllinnen ulyn alkogolden májbúrlep emdeýge kómektesýin surady. Politsei barlyq jaǵdaidy bilip, ony nazardan tys qaldyrmady. B. Hamidýllin qysqa merzimde óziniń «qamqorlyǵyndaǵy» er adamdy maskúnemdikten emdeý úshin barlyq qajetti qujattardy jinap, oblys ortalyǵyna narkologqa apardy. Materialdar sotqa jiberilip, endi aýyl turǵyny jarty jyl boiy Qostanai qalasynda emdeletin bolady. 70 jastaǵy zeinetker tártip saqshysyna kórsetken kómegi úshin alǵys bildirdi», delingen politsiianyń baspasóz habarlamasynda.
