Qostanai oblysynda birneshe kún buryn joǵalǵan bes jasar qyzdyń denesi tabyldy, dep habarlaidy "Ult aqparat" óńirlik politsiia departamentine silteme jasap.
Vedomstvo málimetinshe, qyzdyń máiiti Jambyl aýylyndaǵy óz úiinen úsh shaqyrym jerde dronnyń kómegimen tabylǵan.
Balanyń denesin jasandy sý qoimasynan politsiianyń aǵa leitenanty Samat Eshanov pen erikti Damir Bekturǵanov tapqan.
Oblystyq politsiia departamentiniń bastyǵy Erlan Omarbekov jaǵdaiǵa qatysty túsinik berdi.
«10 tamyz kúni izdeý jumystarynyń barysynda Erlanqyzy Mádinanyń denesi jasandy arnadan tabyldy. Bul – úlken tragediia. Oblys, respýblika turǵyndary, politsiia qyzmetkerleriniń atynan marqumnyń otbasyna qaiǵyryp kóńil aitamyz. Bárimiz balany aman-esen tabatynymyzǵa sońyna deiin senip, úmittenip júrdik. Alaida, jaǵdai basqasha boldy», - dedi ol.
Qazirgi ýaqytta tergeý jumystary júrip jatyr.
Eske salaiyq, 2017 jyly týǵan Madina Erlanqyzy 7 tamyzda Qostanai oblysyna qarasty Jambyl aýylyndaǵy úiinen tańǵa jýyq shyǵyp ketken. Bala 18 jáne 13 jastaǵy ápkeleriniń baqylaýynda bolǵan. Qyzdar tańerteń oianǵanda búldirshindi tappai qalǵan. Qyzdyń anasy politsiianyń kómegine júgingen.
Balany izdeý jumystaryna teplovizor da qoldanyldy. Keiin erikti ony qalai kórip qalǵanyn aityp bergen edi. Júgeri alqaptarynyń birinen bala tisiniń izi bar júgeri tabyldy. Ol saraptamaǵa jóneltildi. Izdeý toby aýyl mańaiyndaǵy egistik alqaptaryna áýe sharyna bailanǵan azyq-túlikter qaldyrdy. Sondai-aq Rýdnyi deltaklýbynyń nusqaýshylary egistik alqaptaryn túni boiy deltaplandarmen tintip shyqty.
