QR Premer-Ministri Álihan Smaiylov Qostanai oblysyndaǵy alapat tabiǵi órtterdiń saldaryn joiý máseleleri boiynsha jedel keńes ótkizdi, dep habarlaidy "Ult aqparat" primeminister.kz saityna silteme jasap.
Tótenshe jaǵdailar birinshi vitse-ministri Ibragim Kúlshimbaev kúrdeli meteorologiialyq jaǵdaiǵa, aýa temperatýrasynyń 36 gradýstan asýyna bailanysty Qostanai oblysynda, ásirese orman alqaptarynda kúrdeli órt jaǵdaiy qalyptasqanyn baiandady. 43 myń ga orman sharýashylyǵy órtke orandy.
Qazirgi ýaqytta 1 841 adam qaýipsiz jerge kóshirilip, ystyq tamaqpen qamtamasyz etildi. Jedel jeli ashylyp, zardap shekkendermen psihologtar jumys istep jatyr. 10 adam zardap shekti, bir adam qaitys boldy.
108 úi-jai joiylyp, búlingen. Órt sóndirýge jeke quramnan 600-den astam adam jáne 100-ge jýyq tehnika jumyldyryldy. Tikushaqtar iske qosyldy. Jedel shtab jumys istep jatyr, QR TJM basshysy oqiǵa ornynda júr.
Úkimet basshysy Tótenshe jaǵdailar, Indýstriia jáne infraqurylymdyq damý, Aýyl sharýashylyǵy, Qarjy ministrlikterine jáne Qostanai oblysynyń ákimdigine turǵyndar men aýyl sharýashylyǵyna keltirilgen zalaldy baǵalaýdy tapsyrdy.
Qarjy jáne Ulttyq ekonomika ministrligine Úkimettiń rezervinen órtten keltirilgen zalaldy óteýge qarajat bólý týraly qaýly jobasyn daiyndaý tapsyryldy.
Sonymen qatar Álihan Smaiylov baspanasynan aiyrylǵan azamattar úshin jańa turǵyn úiler salý jumysyn shuǵyl bastaýdy tapsyrdy.
«Qurylysty qysqa merzimde aiaqtaý úshin jedel jumys isteýimiz kerek. Bul másele – Prezidenttiń jeke baqylaýynda», — dedi Álihan Smaiylov.
Sonymen qatar Indýstriia jáne infraqurylymdyq damý ministrligine Qostanai oblysynyń zardap shekken aýdandarynda kólik qatynasyn qalpyna keltirý jáne barlyq injenerlik jáne infraqurylymdyq obektilerdiń úzdiksiz jumys isteýin qamtamasyz etý tapsyryldy.
Aýyl sharýashylyǵy ministrligine oblys ákimdigimen birlesip, qajet bolǵan jaǵdaida zardap shekken fermerlerge jáne jeke qosalqy sharýashylyq ielerine kómek kórsetý tapsyryldy.
Sondai-aq Álihan Smaiylov Densaýlyq saqtaý ministrligine zardap shekkenderge qajetti meditsinalyq kómek kórsetýdi, Eńbek jáne halyqty áleýmettik qorǵaý ministrligine oblys ákimdigimen birlesip, áleýmettik kómek kórsetýdi, Ishki ister ministrligine evakýatsiia aimaqtarynda azamattardyń qoǵamdyq qaýipsizdigin jáne múlkiniń búlinbeýin qamtamasyz etýdi, sondai-aq halyq arasynda otty abaisyz paidalanǵany úshin jaýapkershilik týraly túsindirý jumystaryn kúsheitýdi tapsyrdy.
