Qostanai oblysynda «Brakoner» operatsiiasy júrgizilip, zań buzǵandar anyqtaldy, dep habarlaidy "Ult aqparat".
Is-shara barysynda politsiia qyzmetkerleri men tabiǵatty qorǵaý uiymdarynan 59 mobildik top quryldy. Qyzmetkerler ańshylyq jerlerinde, sý aidyndarynda jáne orman alqaptarynda tabiǵat qorǵaý zańnamasyn buzýdyń jolyn kesý jáne anyqtaý boiynsha 1590-nan astam reidtik is-shara ótkizdi.
«Politsiia qyzmetkerleri zańsyz ań aýlaý jáne aǵash kesý derekterine qatysty 4 qylmystyq quqyq buzýshylyqty anyqtady. Qostanai aýdanynyń Limannyi aýylynyń mańynda politsiia qyzmetkerleri «VAZ 2121» avtokóligin toqtatqan. Avtomobil júk salǵyshyn tekserý kezinde eki sibir eligi jáne tirkeýge alynǵan úsh myltyq tabyldy. Belgili bolǵandai, jolaýshylardyń bireýi eki elik atyp alǵan», - delingen oblystyq politsiia departamenti baspasóz qyzmetiniń aqparatynda.
Zańsyz ań aýlaýdyń taǵy bir deregi Qamysty aýdanynda tirkelgen. Taldykól aýylynan 10 shaqyrym jerde Rýdnyi qalasynyń eki turǵyny ustaldy. Ań aýlaityn sharýashylyqta júrgen ańshylar 7 qaz atqan, olardyń biri – Qyzyl kitapqa engizilgen «Shiqyldaq qaz» tuqymy.
Jalpy, ań aýlaý erejelerin buzǵany úshin 72 adam ákimshilik jaýapkershilikke tartyldy. Balyq aýlaý erejelerin buzǵany úshin 23 balyqshy, sondai-aq 26 ańshy qarýdy saqtaý, alyp júrý jáne tasymaldaý erejelerin buzǵany úshin aiyppul arqalady. Aita keterlik jait, jedel aldyn alý is-sharasy kezinde 700 myń teńgeden astam ákimshilik aiyppul óndirildi.
