Qostanai oblysy politsiia departamentiniń muraǵatynda qýǵyn-súrgin jyldary zańsyz sottalǵan 4349 adamǵa qatysty qylmystyq is bar, dep habarlaidy vedomstvonyń baspasóz qyzmeti.
31 mamyr – qýǵyn-súrgin jáne asharshylyq kezeńi qurbandaryn eske alý kúni. Elimizde qurbandardy eske alý úshin kóptegen is-shara ótkiziledi, mýzeilerde kórmeler ashylady. Sonyń biri – Qostanai oblysy politsiia departamentiniń murajaiy. Qazir mýzei onlain rejiminde jumysyn jalǵastyrýda. Qostanai oblysy PD mýzeiiniń meńgerýshisi Nazira Tsymbaliýktiń aitýynsha, vedomstvonyń Arnaiy memlekettik muraǵatynda zańsyz sottalǵan 4349 adamǵa qatysty qylmystyq ister saqtalyp tur. Keiin olardyń bári aqtalyp shyqqan.
«1921-1954 jyldar aralyǵynda Qazaqstanda 100 myń adam sottalyp, 25 myń adam atý jazasyna kesilgen. Qatań jazaǵa tipti áielder de ilikken. Tek «Shirkeýler» dep atalatyn eki toptyq is boiynsha ǵana 24 áiel oqqa ushty, olardyń jalǵyz kinási – Qudaiǵa sengeni. Jalpy musylman jáne pravoslavtyq dini qyzmetkerler óz senimin ustanǵany úshin, tipti bilik tarapynan tyiym salynǵan jaǵdaida da dini joralardy oryndaýǵa umtylǵany úshin aiyptaldy», - deidi N. Tsymbaliýk.
Zańsyz qýǵyn-súrginderden qazaq ultynyń ókilderi aitarlyqtai zardap shekti. Politsiia kórmesinde olardyń fotosýretteri jáne kinásizdigi týraly aryzynyń túpnusqasy saqtalǵan. Máselen, 1938 jyldyń aqpanynda KSRO Joǵarǵy Sotynyń Áskeri alqasy Habibýly Bashaevty atýǵa úkim shyǵarǵan, ol tek 1958 jyldyń 1 naýryzynda aqtaldy. Osyǵan uqsas aiyp boiynsha Amangeldi aýdandyq partiia komitetiniń hatshysy Izmailov Hairýsh Nurýshevich atý jazasyna kesilgen. Ol 1959 jyly ultshyl uiymǵa qatystylyǵy týraly dáleldemelerdiń bolmaýyna bailanysty aqtaldy.
Qostanai oblysynda Qiyr Shyǵys pen Ýssýrii ólkesiniń aýdandarynan shyqqan 100-den astam káris ókilderi atylǵan. Olardyń keibireýlerine qatysty qylmystyq ister birneshe betten turady, olardyń kóbi orys tilin meńgermegen adamdardyń kinásin moiyndaýǵa negizdelgen.
Barlyq qýǵyn-súrginge ushyraǵan, aqtalǵan azamattar týraly qysqasha aqparat QR IIM vedomstvolyq web-portalynyń «Memorial» respýblikalyq servisinde usynylǵan, ol arqyly kez kelgen azamat óziniń qýǵyn-súrginge ushyraǵan týystary týraly málimetterdi taba alady.
«Bul – elimizdiń tarihyndaǵy erekshe kúnderdiń biri. Biz árqashan qýǵyn-súrgin qurbandaryn eske alamyz. Oblysymyzda ishki ister organdaryndaǵy eń kóne mýzei jumys istep tur jáne onda kóptegen tarihi eksponat bar. Sondyqtan politsiia qyzmetkerleri Departamenttiń murajaiyna jii baryp, Qazaqstan tarihymen jáne politsiianyń qurylý tarihymen tanysady. Árbir politsiia qyzmetkeri elimizdiń tarihyn bilý kerek ekenin únemi aityp otyramyz», - deidi Qostanai oblysy PD bastyǵynyń orynbasary politsiia polkovnigi Ardaq Yntyqbaev.
