Qostanai oblysynda jer telimderin zańsyz paidalaný faktileri azaimai otyr. Bul týraly oblys ákimdiginde ótken apparat májilisinde aityldy, – dep habarlaidy QazAqparat.
2019 jyly aýyl sharýashylyǵy maqsatyndaǵy jerlerge tekserý júrgizý kezinde bos jatqan 222,2 myń gektar jer anyqtalǵan. Búginde jerdi paidalaný jáne qorǵaýdy baqylaý basqarmasynyń inspektorlary 13,2 myń gektar alqaptaǵy zańbuzýshylyqtardy joidy. Al burynǵy menshik ieleri 3,2 myń gektar jaiylymdyq jerden óz erikterimen bas tartty. Qalǵan 205,9 myń ga jer basqarma baqylaýyna alyndy.
«Ótken jyly basqarma mamandary oblysta 566 tekserý júrgizdi. Nátijesinde 325 zańbuzýshylyq anyqtaldy. Inspektorlar jerdi zańsyz ielengenderge 23,6 mln teńge aiyppul saldy. Onyń ishinde 20,1 mln teńge oblys biýdjetine óndirip alyndy. 1 mln teńge májbúrli túrde óndirip alý úshin jeke sot oryndaýshylarynyń palatasyna jiberildi. 2020 jylǵy 1 qańtardaǵy málimet boiynsha barlyǵy 320 myń gektar alqap memleket menshigine qaitaryldy. Onyń ishinde 115 myń gektar alqap sot tártibimen májbúrli túrde alyndy. Bul jer telimderi Jankeldin, Jitiqara, B.Mailin atyndaǵy aýdandarǵa tiesili»,- deidi oblys ákimdiginiń jerdi paidalaný jáne qorǵaýdy baqylaý basqarmasynyń bastyǵy Nurlan Ábdýov.
Oblys ákimi Arhimed Muhambetov basqarma bastyǵyna óńirde qaraýsyz qalǵan alqaptardy memleket menshigine qaitarý máselesin basa aitty.
«Basqarma tolyqqandy jumys istep otyrǵan joq. Zańsyz jer ielenýshilermen kúres álsiz júrgizilýde. Memlekettiń jer telimin májbúrli túrde óndirip alý úshin sot sheshimin jeke sot oryndaýshylaryna jiberesizder. Ary qarai ne boldy? Bastaǵan isti sońyna jetkizbegensizder! Ásirese, jeri qunarly soltústik aýdandarda jumysty kúsheitý kerek. Qazir bos jatqan jerdiń bári naqty maqsatqa baǵyttalýy tiis. Aýdan, qala ákimderi jáne oblystyq basqarma osy baǵytta jospar quryp, jumysty mindetine alsyn!» - dep tapsyrdy oblys basshysy.
