Foto: Polisia.kz
Qostanai oblysynda alkogolge táýeldilikti azaitý, quqyq buzýshylyqtyń aldyn alý jáne salaýatty mádeni ortany qalyptastyrý maqsatynda «Mádeni qoǵam» jobasy belsendi júzege asyrylyp jatyr, dep habarlaidy Ult.kz.
Jobanyń eń mańyzdy jetistikteriniń biri – 17 aýyldyń alkogolden tolyq bas tartýy. Bul eldi mekender salaýatty ómir saltynyń úlgisin kórsetip, ózge óńirlerge de oń áser etýde.
Joba keń qoǵamdyq qoldaýǵa ie. Qalalar men aýyldarda qurmetti aqsaqaldar, din ókilderi men belsendi azamattardan quralǵan qoǵamdyq komissiialar jumys isteidi. Olar alkogolge táýeldi jandarǵa qoldaý kórsetip, túsindirý jumystaryn júrgizýde. Sonymen qatar ishimdik satatyn oryndarǵa reidter uiymdastyrylyp, zań buzýshylyqtardyń aldyn alýǵa erekshe nazar aýdarylyp otyr. Politsiia, eriktiler men BAQ ókilderiniń qatysýymen ótkizilgen tekserýlerdiń nátijesinde 2025 jyldyń basynan beri túngi ýaqytta nemese kámeletke tolmaǵandarǵa alkogol satý boiynsha 217 zań buzýshylyq anyqtalǵan.
Oblystyq politsiia departamenti bastyǵynyń orynbasary Amanjol Baizaqovtyń aitýynsha, biylǵy 7 aida mas kúiinde jasalǵan qylmystar 3,3 paiyzǵa azaiǵan. Alaida qoǵamdyq tártipti jii buzatyn, otbasynda janjal shyǵaratyn jáne ishimdikke úiir adamdardy baqylaý jalǵasyp jatyr. Jyl basynan beri sot sheshimimen 2600 adamǵa alkogol tutynýǵa tyiym salynǵan, onyń ishinde úi jaǵdaiynda da.
«Mádeni qoǵam» jobasy 2024 jyldyń qyrkúieginen bastap qolǵa alynǵan. Basty maqsaty – ziiandy ádettermen kúresý arqyly mádeni ári qaýipsiz qoǵam qalyptastyrý. Qostanai oblysy bul baǵytta batyl qadam jasap, ishimdikke táýelsiz, salaýatty ómir salty bar eldi mekenderdiń qataryn arttyrýda.
