Qostanai oblysynda jer telimderin paidaǵa jarata almai júrgender ákimshilik jaýapqa tartyldy, dep habarlaidy "Ult aqparat".
Qostanai oblysynda paidalanylmaǵan jerlerdi qaitarý jóninde júieli jumystar júrgizilip jatyr. 6 jyl ishinde qaitarylǵan jerlerdiń jalpy kólemi 1 mln gektardan asady. Qostanai oblysy ákimdiginiń jerdiń paidalanylýy men qorǵalýyn baqylaý basqarmasy basshysynyń orynbasary Ásel Tabergenovanyń aitýynsha, ózderine berilgen alqaptardy paidasyna jarata almai júrgender ákimshilik jaýapqa tartyldy.
«Elimizde kádege jaratylmaǵan alqaptardy túgendeý jumystary birneshe jyl qatarynan júrgizilip jatyr. Jer ýchaskesin utymdy paidalanbaý qatań tekseriledi. 2012-2018 jyldar aralyǵynda aimaqta paidalanylmai bos jatqan 1 mln 578 myń gektar anyqtaldy. Onyń 1 mln 256 myńy jaiylymǵa arnalǵan bolsa, qalǵany egindik jerler. 1 mln gektar jer maqsatty qoldanylmaǵany úshin memleket menshigine qaitaryldy. Al qurylysqa arnalǵan alqapty teris maqsatta paidalanǵan 36 jer ýchaskesiniń iesi jazaǵa tartyldy. Olar 1 jyldan astam ýaqyt boiy jerdi alyp, eshqandai qurylys salmaǵan. Qaǵaz júzinde qojaiyndaryna eskertý jasaldy. Ári qarai sottyń qaraýyna jiberiledi», - deidi Ásel Tabergenova.
Jalpy, Qostanai oblysynda 17 mln gektar jer aýyl sharýashylyǵyna qoldanýǵa arnalǵan.
