Qostanai oblysynyń Jangeldin aýdany aýmaǵyna zymyran qaldyqtary qulady, dep habarlaidy "Ult aqparat".
Jangeldin aýdany ákiminiń orynbasary Dinmuhamed Bidashevtiń sózinshe, zymyran qaldyqtarynan qaýip joq. Bul halyqaralyq OneWeb baǵdarlamasy sheńberinde júzege asyp otyr.
«Zymyran synyqtary aýdan aýmaǵyna 7 aqpan kúni qulady. Bul arnaiy kelisim boiynsha jasalyp otyr. Turǵyndarǵa eskertildi. Himikattar nemese suiyqtyqtar jerge tógilgen joq. 10 aqpanda synyqtar ýtilizatsiialaýǵa alyndy», - dedi Dinmuhamed Bidashev.
Aita keteiik, byltyr osy máselege qatysty Jangeldin aýdanynda jiyn ótken-di. Memleket sheshimi boiynsha Shóptikól eldi mekeni mańynan Reseidiń zymyran qaldyqtaryn qulatýǵa jer berildi. Qaldyqtar belgilengen jyldar ishinde 8 ret qulaidy. Sondai-aq, aýdan biýdjetine jyl saiyn 151 mln teńge qarjy aýdarylady. Al qaldyq tastalatyn Aqkól men Qarasý aýyldaryna jedel járdem kólikteri bólinip, aýyzsý tartylady.
