Foto: Tengrinews.kz/Turar Qazanǵapov
Qosshy qalasy prokýratýrasynyń aktisi boiynsha quny 120 mln teńge bolatyn jer ýchaskesi memleketke qaitaryldy, dep habarlaidy Sputnik Qazaqstan agenttigi Aqmola oblysynyń prokýratýrasyna silteme jasap.
Qala prokýratýrasy jer zańnamasynyń qoldanylýyn taldaý barysynda ákimdik kommertsiialyq maqsatta jer berý kezinde óreskel zańbuzýshylyqtarǵa barǵanyn anyqtady.
Máselen, Qosshy aýyldyq okrýgi ákiminiń ókimimen 2016 jylǵy tamyzda Jaýapkershiligi shekteýli seriktestikke aýdany 3,2778 gektar jer ýchaskesin ýaqytsha paidalanýǵa bergen. Osy ókim negizinde kásiporyn men Tselinograd aýdanynyń jer qatynastary bólimi arasynda jer ýchaskesin ýaqytsha óteýli paidalaný týraly shart jasalǵan.
"Sodan keiin jaldaý merzimi birneshe ret uzartylǵan. Alaida 2016 jyldan beri kásiporyn jer ýchaskesin nysanaly maqsaty boiynsha paidalanbaǵan. Al qujattarǵa súiensek, JShS ol jerde turǵyn úi keshenin salýdy kózdegen", - delingen habarlamada.
Jer ýchaskesiniń kadastrlyq quny – 65 mln teńge. Ol Qosshy qalasynyń ortalyǵynda ornalasqan jáne joǵary investitsiialyq tartymdylyqqa ie. 2021 jyly kásiporyn osyny paidalanyp jer telimin jaldaý quqyǵyn basqa zańdy tulǵaǵa 120 mln teńgege satqan.
Alaida qadaǵalaý organy jer ýchaskesi Jer kodeksiniń 48-babynyń normalaryn buza otyryp, atap aitqanda, saýda-sattyq (konkýrstar, aýktsiondar) ótkizilmei berilgenin anyqtady.
Prokýratýranyń usynysymen Aqmola oblysynyń jer resýrstaryn basqarý departamenti jaldaý sharttaryn jaramsyz dep taný týraly talap-aryz engizdi.
2022 jylǵy 7 qarashada Aqmola oblysy mamandandyrylǵan aýdanaralyq ekonomikalyq sotynyń sheshimimen departamenttiń talap-aryzy qanaǵattandyrylyp, jer memleketke qaitaryldy. Sot sheshimi biyl 16 aqpanda zańdy kúshine endi.
Qosshy qalasy ákimdiginiń málimetinshe, osy jer ýchaskesinde "Jaily mektep" jobasy aiasynda mektep salý josparlanyp otyr. Sebebi qalada halyq sanynyń qarqyndy ósýine bailanysty jyldan jylǵa mektep tapshy.
