Foto: instagram.com/oo_qanat
Qosshyda 40 jastaǵy er adam toǵyz jastaǵy balany soqqyǵa jyqty. Politsiia qylmystyq is qozǵady, - dep habarlaidy Tengrinews.kz agenttigi.
Bul oqiǵa týraly Instagram-daǵy toptardyń birinde belgili boldy.
"Balany kórshisi jurttyń kózinshe soqqyǵa jyǵyp, azý tisin qaǵyp jibergen, miy shaiqalyp qalǵan", - delingen habarlamada.
Jábirlenýshiniń anasy Iýliia Manýkian toǵyz jastaǵy ulyn kórgende ony kólik qaǵyp ketti dep oilaǵan.
"Keshe jumysta bolǵanmyn, balalar úide edi. 18 jastaǵy qyzym Qosshyda turady, ulym qasynda bolǵan. Qyzymnyń sózinshe, balam syrtqa shyǵyp, biraz ýaqyttan keiin kózine jas tolyp kelgen. Ústi las, qansyrap ketken. Qyzym sýretin jiberdi, ol qazir Jelide tarap ketti. Tóbelesten keiin mundai bolady dep oilamappyn. Ádette balalar bir-birimen tóbelesedi ǵoi. Qyzym habarlasyp, kórshi er adam soqqyǵa jyqqanyn aitty" - deidi balanyń anasy Tengrinews.kz tilshisine.
Áiel adamnyń sózinshe, bastapqyda balalar ózara janjaldasyp qalǵan. Artynsha, ákesi ulyn "qorǵaýǵa" shyqqan.
"Ony birden aýrýhanaǵa alyp kettik. Búgin sot saraptamasyn jasattyq, azý tisi túsip qalǵan, kóziniń ainalasy kógerip ketken, sebebi ony judyryqpen urǵan. Sosyn ony ustap alyp, aýzyna balmuzdaq tyqqan, sol kezde tisin qaǵyp alǵan. Ulym qansyrap ketkenin, qatty aýyrǵanyn aitady. Ony sondaǵy balalar da, eresekter de kórdi", - deidi Iýliia.
Aqmola oblystyq Politsiia departamenti ókilderi balanyń anasy kezekshi bólimge 30 mamyrda aryz jazǵanyn aitty.
"Qosshynyń 39 jastaǵy turǵynynan 2012 jyly týǵan ulyn soqqyǵa jyqqan 40 jastaǵy turǵynǵa qatysty shara qoldaný týraly aryz tústi. Kámeletke tolmaǵan balalar arasynda janjal shyqqan. Saldarynan balalardyń biri ákesine barǵan. Er adam kámeletke tolmaǵan balany judyryqpen uryp, artynsha bala bul oqiǵa týraly ata-anasyna aityp bergen", - dedi politsiia ókilderi.
Bul derek boiynsha balanyń densaýlyǵyna keltirilgen ziiandy anyqtaý úshin sot-meditsinalyq saraptama taǵaiyndaldy. Búginde sotaldy tergeý júrip jatyr.
