Aqmola oblysynyń ákimi Ermek Marjyqpaevtyń ókimimen Qosshy qalasynyń ákimi taǵaiyndaldy, dep habarlaidy "Ult aqparat" oblystyq ishki saiasat basqarmasynyń baspasóz qyzmetine silteme jasap.
Ǵaidar Qasenov Atbasar aýdanynyń týmasy. S.Seifýllin atyndaǵy agrarlyq ýniversitetti, L.N. Gýmilev atyndaǵy Eýraziia ulttyq ýniversitetti, Halyqaralyq biznes akademiiasyn támámdaǵan. Ekonomika ǵylymdarynyń kandidaty.
Eńbek jolyn 1998 jyly Astana qalasy Almaty aýdany ákimi apparatynyń bas mamany bolyp bastaǵan. 2001 jyldan 2006 jylǵa deiin kommertsiialyq qurylymdarda basshylyq laýazymdarda jumys istedi. 2006-2008 jyldary Astana qalasy Almaty aýdany ákiminiń orynbasary, keiin aýdan ákimi qyzmetterin atqarǵan.
2008-2015 jyldary «Qaztemirtrans»AQ Korporativtik damý jónindegi vitse-prezidenti bolyp jumys istedi. Taǵaiyndalǵanǵa deiin Aqmola oblysy Shortandy aýdanynyń ákimi bolyp eńbek etti.
Eske sala keteiik, 2021 jylǵy 27 shildede QR Prezidenti Qasym-Jomart Toqaev Aqmola oblysynyń ákimshilik-aýmaqtyq qurylysyndaǵy ózgerister týraly Jarlyqqa qol qoidy.
«Qazaqstan Respýblikasynyń ákimshilik-aýmaqtyq qurylysy týraly» Qazaqstan Respýblikasynyń 1993 jylǵy 8 jeltoqsandaǵy Zańynyń 9-babyna sáikes Aqmola oblysynyń Tselinograd aýdany odan oblystyq mańyzy bar qala mártebesin alǵan Qosshy aýylyn bólý jolymen qaita uiymdastyryldy.
