Foto: janabastau.kz
Qosshy qalasynda 2023 jyldyń 1 qyrkúiegi kúni 1500 jáne 1200 orynǵa arnalǵan 2 jańa mektep ashylyp, paidalanýǵa berildi. Jańa mekteptiń ashylý saltanatyna oblys ákimi Ermek Marjyqpaev, Oqý-aǵartý ministri Ǵani Beisembaev, Qosshy qalasynyń ákimi Gaidar Qasenov, «Vernyi Kapital» investitsiialyq tobynyń bas direktory Erlan Ospanov, «Bolat Ótemuratov» qory Qamqorshylyq keńesiniń tóraǵasy Almas Sharman, t.b resmi qonaqtar, ata-analar qatysyp, júrekjardy tilekterin arnady, dep habarlaidy janabastau.kz.
Jeke investitsiia esebinen salynǵan 1500 oryndyq mektep-gimnaziianyń ashylý saltanatynda oblys ákimi Ermek Marjyqpaev Memleket basshysynyń tapsyrmasymen biylǵy jyly óńirde 10 mekteptiń qurylysy bastalǵanyn, olardyń deni 2024 jyly paidalanýǵa beriletinin aitty. Jańa qurylystar negizinen Astana qalasynyń mańyndaǵy Arshaly, Tselinograd, Shortandy aýdandary jáne Qosshy qalasynda ornalasqan. Sonyń ekeýi búgin Qosshy qalasynda ashylyp otyrǵanyna rizashylyǵyn bildirdi.
«Qosshy qalasynda turǵyndar sany jedel ósýine bailanysty mektep tapshylyǵy týyndap, balalardy úsh aýysymmen oqytýǵa týra keldi. Bul problemany sheshý úshin 2022 jyly 1200 oryndyq bir jańa mektep ashyldy. Endi mine ekeýiniń qurylysy aiaqtalyp, paidalanýǵa berilip jatyr. Sondai-aq, «Jaily mektep» ulttyq jobasy aiasynda 2024-2025 jyldar kezeńinde 3 mektep salý josparlanǵan. Bul bilim oshaqtaryndaǵy shamadan tys júktemeni azaityp, úsh aýysymdyq oqý júiesin joiýǵa septigin tigizdi» dep atap ótti Ermek Boranbaiuly.
Aita keteiik, biyl memlekettiń qoldaýymen respýblika boiynsha 130 myń oqýshyǵa arnalǵan 154 mektep iske qosylmaqshy. Onyń 55 myń oqýshyǵa arnalǵan 39 mektebi 1 qyrkúiekte esigin aiqara ashty.
«Búgingi kúni Qazaqstan boiynsha 3 million 9 myń oqýshy alǵash ret mektep tabaldyryǵyn attap, sizdermen birge toilap jatyr desek bolady. Onyń ishinde 400 myńǵa jýyq búldirshin 1 synypqa barsa, 18 myńnan astam 11 synypty bitirmekshi. Qurmetti ustazdar, oqýshylar, ata-analar sizderdi bilimniń alǵashqy kúnimen shyn júrekten quttyqtaýǵa ruqsat etińizder. Sizderdiń shákirtterińiz úmitterińizdi aqtap, osy bilim oshaǵynan el tizginin ustar eldiń azamattary bolyp shyǵýyna shyn júrekten tilektespin» dedi Oqý-aǵartý ministri Ǵani Beisembaev.
Memleketimiz bilim salasyna únemi qoldaý kórsetip otyrady. Sonyń aiqyn aiǵaǵy – «Jaily mektep» ulttyq jobasy sheńberinde elimizde buryn-sońdy bolmaǵan jańalyq – 400 jańa úlgidegi mektepter soǵylmaqshy. Onyń 200-den astamynyń qurylysy qazirdiń ózinde júrgizilip jatyr. Munyń bári memleketimizdegi apatty jáne úsh aýysymdyq mektepterdiń máselesin sheshýge baǵyttalǵan.
«Vernyi Kapital» investitsiialyq tobynyń bas direktory Erlan Ospanov Qosshy qalasynyń ákimi Gaidar Qasenovke jańa ǵimarattyń simvolikalyq kiltin tabys etti. Jalpy aýmaǵy 17,5 myń sharshy metr bolatyn jeke investitsiiaǵa salynǵan mekteptiń merdigeri – "Bazis Construction". Onyń smetalyq quny -7,6 mlrd. teńge. Mektep tolyq jabdyqtalǵan, oqý kabinetteri qajetti kompiýterlik jabdyqtarmen qamtamasyz etilgen, 360 oryndyq ashana, 280 oryndyq akt zaly, 2 sport zaly, 4 informatika kabineti, mýzykalyq aspaptar kabineti, býfet, kitaphana, 3 kitap qoimasy, sondai-aq gimnaziiada (qysh sheberhanasy, robottehnika, fotostýdiia kabinet siiaqty) arnaiy kabinetter bar. Budan bólek himiia, fizika, biologiia, tehnologiia kabinetteri barlyq qajetti jabdyqtarmen tolyq qamtylǵan. Oqý kabinetteri sanitarlyq talaptarǵa sáikes mektep jihazdarymen jabdyqtalǵan. Mektep aýmaǵynda fýtbol jáne basketbol alańy bar.
Ǵimarat 3 (úsh) qabatty, jedelsaty júiesi jumys isteidi. Jalpy oqýshylar sany – 2 657.
Gimnaziiaǵa kire beriste týrniketter ornatylǵan, ol mektepke kirý bet determinanty (FaseID) arqyly júzege asyrylady. Mektep oqýshylary men qyzmetkerleriniń derekter bazasy qurylǵan. Mektep joǵary sapaly, zamanaýi tehnologiialyq jabdyqtarmen jabdyqtalǵan.
Sondai-aq búgin Qosshy qalasynda 1200 oryndyq №3 taǵy bir mektep ashyldy. Mekteptiń jalpy aýdany - 20357 myń sharshy metr. Ǵimarat 3 qabattan, 6 bloktan turady. Oqý kabinetteriniń sany-50. Himiia, fizika, biologiia, tehnologiia kabinetteri, qajetti jihazben tolyqtai jabdyqtalǵan. 384 oryndyq ashana, 600 oryndyq akt zaly, aýdany 520 sharshy metr sport zaly, metal, aǵash, mata óńdeý sheberhanalary, alǵashqy áskeri daiyndyq kabineti bar.
Mektep aýmaǵynda fýtbol jáne basketbol alańy bar. Barlyq qabyldanǵan oqýshylar sany-590 oqýshy. Oqýshylar sany taǵy kóbeiedi dep kútilýde.
Sóitip, 2023-2024 oqý jylynyń basynda mektepke Qosshy qalasy boiynsha 10 809 oqýshy bardy. Birinshi synyp oqýshylarynyń sany –1321, onyń ishinde jeke mektepte – 77, Taitóbedegi mektepte – 71.
Qalanyń bilim berý uiymynyń jelisine 31 balabaqsha kiredi. Onda 3 667 bala tárbielenip jatyr. 420 oryndyq 2 memlekettik balabaqsha («Altyn dán» jáne «Sulý-ai») jáne 3 263 balaǵa arnalǵan 29 jeke balabaqsha bar. Qazirgi ýaqytta balabaqsha kezeginde barlyǵy 1 456 bala tur.
2024 jyly Abai Qunanbaev kóshesinde jobalyq qýaty 1200 oryndyq mektepti iske qosý josparlanýda, sonymen qatar 2024 jyly Qosshy qalasy men Taitóbe aýylynda «Jaily mektep» baǵdarlamasy boiynsha 3 birdei bilim oshaǵanyń irgetasy qalanyp bastalady. Bul mektepterdi 2025 jyly paidalanýǵa berý josparlanýda.
