Memlekettik hatshy QR Prezidenti janyndaǵy Sybailas jemqorlyqqa qarsy is-qimyl máseleleri jónindegi komissiiasynyń otyrysyn ótkizdi, dep habarlaidy Aqorda.
QR Memlekettik hatshysy Qyrymbek Kósherbaevtyń tóraǵalyǵymen Qazaqstan Respýblikasy Prezidenti janyndaǵy Sybailas jemqorlyqqa qarsy is-qimyl máseleleri jónindegi komissiianyń otyrysy ótti. Jiynda keden salasyndaǵy sybailas jemqorlyqqa qarsy qabyldanyp jatqan sharalar jaiy qaraldy.
Memlekettik hatshy Táýelsizdik alǵannan beri Qazaqstannyń Tuńǵysh Prezidenti – Elbasy N.Á.Nazarbaev keden qyzmetin memleket qurý isindegi mańyzdy salalardyń biri retinde erekshe kóńil bólgenin atap ótti. Sodan bergi ýaqytta zańnamalyq jáne uiymdastyrý turǵysynda qyrýar jumys atqaryldy, zamanaýi kedendik infraqurylym jasaldy. Degenmen, atalǵan salada aitarlyqtai damý bolǵanymen, keden qyzmetindegi barlyq problema túbegeili sheshildi dei almaimyz.
Osy oraida Memleket basshysy Qasym-Jomart Kemeluly Toqaev kedendik júieniń tiimdiligin arttyryp, odan túsetin tabysty kóbeitýdi tapsyrdy.
Keden salasyn jetildirý maqsatynda elektrondy deklaratsiia tapsyrý jumysy jetildirildi, táýekelderdi basqarý júiesi engizildi, basqa organdardyń aqparat júielerimen integratsiia ornatylyp, qujat almasý, uiymdastyrý isi jolǵa qoiyldy. Keden salasyna qatysty zańnamany jetildirý baǵytynda Memleket shekarasynda zańsyz saýda ainalymyna qarsy is-qimyldyń keshendi jospary qabyldanyp, Kóleńkeli ekonomikaǵa qarsy is-qimyl jónindegi 2021-2023 jyldarǵa arnalǵan keshendi is-sharalar josparynyń jobasy ázirlendi.
Sybailas jemqorlyqqa qarsy, Qarjylyq monitoring agenttikteriniń, Bas prokýratýranyń, «Atameken» ulttyq kásipkerler palatasynyń, Qarjy ministrliginiń basshylary atalǵan saladaǵy sybailas jemqorlyq jáne basqa da zań buzýshylyq áreketterdi anyqtaý jóninde, kinálilerdi zańda belgilengen tártippen jaýapqa tartý baǵytynda qabyldanyp jatqan sharalar jaiynda baiandady.
Sonymen qatar otyrys barysynda kedendik protsesterdi tsifrlandyrý, biýdjet kirisin arttyrý, atalǵan saladaǵy sybailas jemqorlyqtyń sebebi men saldary sekildi máseleler talqylandy.
Komissiiada Prezidenttiń kómekshisi – Qaýipsizdik Keńesiniń Hatshysy Áset Isekeshev kedendik baqylaý isin óz deńgeiinde uiymdastyrý jáne sala jumysyn jaqsartý jónindegi usynystaryn ortaǵa saldy.
Jiynda halyqaralyq tájiribedegi kedendik basqarý isine engizilip jatqan ozyq tehnologiialar, onyń ishinde, syrtqy ekonomikalyq qyzmetke jumyldyrylǵan derekqorlardy tsifrlandyrý men proaktivti integratsiialaý máseleleri kóterildi.
Komissiia otyrysynda keden salasyndaǵy ekonomikalyq ósimniń tómendeýine jáne zańdy kásipkerlik qyzmetine jii kedergi keltiretin kemshilikterdi joiý máselesine mán berildi. Muny sheshý úshin keden qyzmeti men kásipkerler arasyndaǵy ózara is-qimyl tetikterin ázirleý, sondai-aq, kedendik quqyq buzýshylyqtarǵa yqpal etetin jaýapsyz qyzmetkerlerdi anyqtaý, quqyq qorǵaý qyzmetiniń tiimdiligin arttyrý týraly usynystar aityldy.
Jiyn qorytyndysy boiynsha naqty usynystar ázirlenip, ony oryndaý Qarjy ministrligine, tiisti memlekettik organdarǵa tapsyryldy.
Komissiia otyrysynyń sońynda QR Memlekettik hatshysy Qyrymbek Kósherbaev kún tártibinde qaralǵan máselege qatysty naqty tapsyrmalar berip, onyń oryndalýy qatań baqylaýda bolatynyn málimdedi.
