QR Parlamenti Májilisiniń depýtaty Vladislav Kosarev trofeilik ańshylyqty damytý boiynsha jasalǵan usynysty synǵa aldy, dep habarlaidy QazAqparat.
«Sizder kári atalyq janýarlarǵa birkalardy ilip qoimaqsyzdar. Bizde ańǵa shyqqan adam jybyrlaǵannyń bárin qyryp-joiyp jatady. Bizde ózimizdiń brakonerler az ba? Kiikterdi atyp boldyq, endi olarǵa sheteldikter qosylsa ne bolady? Elimizde kiikpen qatar inspektordy da atyp jatqan ańshylar bar. Sondyqtan bul baǵytta saqtyq tanytqandaryńyz jón bolar», - dedi depýtat Vladislav Kosarev zań jobasynyń tanystyrylymynda.
Óz kezeginde QR Mádeniet jáne sport vitse-ministri Órken Bisaqaev trofeilik ańshylyqty engizý túsinigine toqtaldy.
«Búginde zańsyz ańshylyq faktisi bar, brakonerlerdiń kóbisi - bizdiń kórshilerimiz. Olar Qazaqstanǵa kirip, arqarlardy jáne basqa da janýarlardy atyp, alyp ketýde. Tájiribe kórsetip otyrǵandai, kóptegen elderde trofeilik ańshylyq engizilgen. Osy oraida janýarlar popýliatsiiasy tiimdi túrde rettelip turady. Bizde ańshylyqty turaqty damytýdyń tiisti modeli ázirlendi. Ony Aýyl sharýashylyǵy ministrligi men tiisti ǵylymi-zertteý institýttary bekitti. Bul turǵyda kári atalyq janýarlardy atý eskerilgen», - dedi vitse-ministr.
Órken Bisaqaev bul baǵyttaǵy sharalar ǵylymi negizdemeler aiasynda iske asyrylatynyn atap ótti.
Budan buryn habarlanǵandai, trofeilik ańshylyqty damytýdyń mańyzdy sharalarynyń biri retinde fermerlik ańshylyq sharýashylyǵy salasynda kásipkerlikti qoldaý eskerilgen.
Aita keteiik, búgin Májiliste «Qazaqstannyń keibir zańnamalyq aktilerine týristik qyzmet máseleleri boiynsha ózgerister men tolyqtyrýlar engizý týraly» zań jobasyn tanystyryldy. Osy oraida elimizde trofeilik ańshylyqty damytý usynyldy.
