Qazaqstannyń Tuńǵysh Prezidenti qory atqarýshy direktorynyń orynbasary, Konstitýtsiialyq Keńestiń burynǵy tóraǵasy Igor Rogov sońǵy kúnderi jurt qyzý talqylaǵan "kadrlyq jarlyqqa" qatysty pikir aitty.
"Jarlyq Qaýipsizdik keńesin basqaratyn Elbasynyń eshbir quzyretin keńeitpeidi. Onyń quzyreti Konstitýtsiiada, Tuńǵysh prezident týraly konstitýtsiialyq zańda jáne Qaýipsizdik keńesi týraly zańda belgilengen. Jarlyqqa engizilgen ózgertýler qandai da bir laýazymdy tulǵalardy taǵaiyndaýdy kelisý tártibine ǵana qatysty. Al ol Jarlyq burynnan beri bar. Oǵan tek keide ózgerister engizilip turdy. Menińshe, bul tusta laýazymdardyń ózgerýine bailanysty ǵana túzetýler engizildi", - dedi Rogov "Vremia" gazetine bergen suhbatynda.
Eske salsaq, 9 qazandaǵy "Qazaqstan Respýblikasy Prezidentiniń keibir aktilerine ózgerister men tolyqtyrýlar engizý týraly" Jarlyq qoǵamda qyzý pikirtalas týǵyzdy. Jarlyqqa sáikes, keibir taǵaiyndaýlar Qaýipsizdik keńesiniń tóraǵasy Nursultan Nazarbaevpen kelisilýi tiis.
"Qos bilik týraly aityla bastaǵanda qoǵamnyń reaktsiiasyna kúlkim keldi. Bul qandai qos bilik bolýy múmkin? Konstitýtsiianyń 44-babynyń 20-tarmaǵynda: "Prezident Qaýipsizdik keńesi men basqa konsýltatsiialyq-keńesshi organdardy, Qazaqstan halqy assambleiasy jáne Joǵarǵy sot keńesin qurady" delingen. Iaǵni, Qaýipsizdik keńesi – konstitýtsiialyq organ, biraq ol konsýltatsiialyq-keńesshi organdar qataryna kiredi", - dedi Rogov.
Onyń aitýynsha, buqaralyq aqparat quraldary "Qaýipsizdik keńesi – qandai da bir qos bilik organy" dep jii málimet taratady.
"Barlyǵynan saiasi biýro elementterin kórý keńestik kezeńnen kele jatqan ádet shyǵar! Prezident – bul jeke dara organ! Bizde qos bilik joq! Al Qaýipsizdik keńesi qabyldaityn sheshimder – basshylyǵynda Elbasy turǵan alqaly organ qabyldaityn sheshimder. Tuńǵysh Prezidenttiń tarihi róli, tájiribesi men bilimin eskere otyryp, qazirgi Memleket basshysy osy usynystardy árine qabyl alady. Biraq eldegi bilik Prezidenttiń qolynda shoǵyrlanǵan", - dedi Igor Rogov.
Rogov Eýropa keńesi Venetsiia komissiiasynyń múshesi, germaniialyq Rolf Mafaeldiń sózin mysalǵa keltirdi.
"Ol maǵan: "Sizder bul máseleni óte jaqsy sheshipsizder: Tuńǵysh Prezidenttiń tájiribesin paidalanyp, turaqtylyq pen demokratiialyq damý jolyn saqtai otyryp, ári qarai dami beresizder" dedi. Bul sheteldik sarapshylardyń bergen baǵasy. Sondyqtan taǵy bir márte bizde eshqandai da qos bilik joq dep aitqym keledi", - dep túiindedi Rogov.
Buǵan deiin Qasym-Jomart Toqaevtyń baspasóz hatshysy Berik Ýáli jarlyq erejelerin túsindirip, Prezident memlekettiń basty laýazymdy tulǵasy retinde ministrlerdi, ózine esep beretin kúsh qurylymdary jáne basqa vedomstvo basshylaryn, sondai-aq oblys ákimderin taǵaiyndaý boiynsha barlyq sheshimderdi qabyldaidy degen edi.
