Májilis spikeri Erlan Qoshanov depýtattarǵa Prezidenttiń málimdemelerinen qorytyndy shyǵaryp, ony aimaqtardaǵy azamattarǵa jetkizý kerek ekenin eskertti, - dep habarlaidy Tengrinews.kz tilshisi.
"Toqtala ketetin mańyzdy jait bar. Keshe Memleket basshysy búginge deiin qordalanyp qalǵan máselelerdi ótkir synǵa ala otyryp, naqty mindetter júktedi. Osy mindetterdiń eń mańyzdysy - elimizdiń áleýetin qalpyna keltirý, halyqtyń tabysyn arttyrý jáne jaqsy jaǵdai jasaý.
Osy maqsattarǵa qoljetkizý úshin Prezident birqatar basym baǵytty belgiledi - adamdardyń kásipkerlikpen ainalysýy úshin teń jaǵdai jasaý, eńbekke qolaily jumys oryndaryn qurý, turǵyn úi jáne densaýlyq saqtaý máselelerin sheshý, infliatsiiany tejeý, qosymsha qarjylandyrý kózderin tabý jáne shaǵyn jáne orta biznesti damytý. Bárińiz tanystyńyz dep oilaimyn", - dedi Qoshanov Májilis otyrysy bastalar aldynda.
Ol depýtattardy áleýmettik-ekonomikalyq mindetterdi sapaly zańdarmen qamtamasyz etýge shaqyrdy.
"Prezident keleńsiz oqiǵalarǵa da toqtalyp, elimizde qaryzǵa belshesinen batqan azamattar men kedeiler qatary kóbeiip kele jatqanyn ashyq aitty. Ásirese, tabystan, adal eńbekten úmitin úzgen jastardyń arasynda táýeldilik paida bolǵanyn qatań synǵa aldy.
Aitylǵan sózden tiisti qorytyndy jasańyzdar, áreket etýimiz kerek. Bir aptadan keiin bárimiz aimaqtarǵa sailaýshylarmen kezdesýge attanamyz. Sodan keiin bul naqty qadamdardy árbir sailaýshyǵa, árbir azamatqa jetkizýimiz kerek. Eldegi problemalar týraly bilińizder. Óitkeni, el igiligi úshin qyzmet etý - ortaq paryzymyz", - dep túiindedi sózin Qoshanov.
