Zardap shegýshilerdiń ókilderi men sottalýshylardyń qorǵaýshylary «Ohotzooprom» inspektory Erlan Nurǵalievtiń ólimi boiynsha isti prokýratýraǵa qaitarýdy surady. Sebebi, eki tarap ta sotqa deiingi tergeýdiń sapasyna kóńilderi tolmaǵan. Sýdia osy isti prokýrorǵa qaitarý týraly úkim shyǵardy, dep habarlaidy "Ult aqparat".
B.Musabekov, B.Qaiyrbekov, J.Myrzabaev, A.Ákimov, B.Ahmetov, N.Shúkildikov, K.Aqshanovqa qatysty qylmystyq is basty sot talqylaýyn taǵaiyndaýǵa kedergi keltiretin qylmystyq is júrgizý zańnamasynyń eleýli buzýshylyqtarynyń anyqtalýyna bailanysty prokýrorǵa aldyn ala tyńdaý satysynan qaitaryldy.
Sáikes úkimdi Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń sýdiasy Bekzat Shalǵymbaev shyǵardy. Aldyn ala tyńdaý barysynda jábirlenýshilerdiń ókili P.Nitsik pen N.Nurǵalieva - advokat Almas Qasqyrbai qylmystyq isti prokýrorǵa qaitarý týraly ótinish bildirip, sotqa deiingi tergeý barysynda sottalýshylar B.Bazarov, B.Kaiyrbekov, J.Myrzabaev, A.Ákimovtiń áreketterinde asa aýyr qylmysty jasyrý jáne asa aýyr qylmys týraly habarlamaý týraly protsessýaldyq sheshim qabyldanbaǵan, bul faktiler tekserilmegen.
Sonymen qatar, sottalýshy K.Aqshanovtyń qorǵaýshysy tergeý organynyń aiyptaý aktisinde qylmys ornynyń tolyq málimetterin kórsetpegenin jáne zańsyz ań aýlaý saldarynan keltirilgen zalaldyń mólsherimen kelispeitinin aityp, qylmystyq isti prokýrorǵa qaitarý týraly ótinish bildirdi.
Bir top adam qasaqana adam óltirdi dep aiyptalǵan sottalýshylardyń qorǵaýshylary qylmystyq bapty qaita kvalifikatsiialaýdy talap etýde. Olardyń pikirinshe, kúdiktiler adam ólimine ákep soqtyrǵan asa aýyr túrde densaýlyqqa ziian keltirgen. Sebebi, qoryqshy Erlan Nurǵaliev oqiǵa ornynda qaza tappaǵan, aýrýhanaǵa jetkizgende tiri bolǵan. Sondai-aq, advokattar politseilerdiń ańshylardyń kiikti atqandaryn dáleldei almaǵanyn aitty. Alaida, «Ohotzooprom» inspektorlary daladan zańmen qorǵalatyn atylǵan 17 janýardy taýyp, olardyń zalalyn 45 mln teńge dep eseptedi.
Biraq, qorǵaýshylardyń pikirinshe, bul soma asyra siltelgen, zalaldyń shyn mánindegi somasy 17 mln teńgeden sál asady.
Sottalýshy Qairat Aqshanovtyń qorǵaýshysynyń ótinishin Berik Ahmetov pen Nurlan Shúkildikovtyń advokattary qoldap otyr. Budan bólek, sot aldyn ala tyńdalym barysynda basqa da zań buzýshylyqtardy anyqtady, atap aitqanda, aiyptaýda qarama-qaishylyqtar anyqtaldy, zardap shegýshilerge qai jerde jáne qai orynda dene jaraqattary jasalǵany kórsetilmegen, kúdiktilerdiń áreketterin saralaý týraly sheshimde qylmystardyń obektivti jaǵy sipattalmaǵan.
Sondai-aq, atalǵan qylmystyq is boiynsha sot óndirisiniń tili qazaq tili dep tańdalǵan, alaida qujattaryń bir bóligi zardap shegýshi Petr Nitsyk úshin orys tiline aýdarylmaǵan.
«Aldyn ala tyńdalym barysynda anyqtalǵan osy buzýshylyqtardyń barlyǵy basty sot talqylaýyn taǵaiyndaýǵa kedergi keltirip otyr. Sondyqtan, sot qylmystyq isti prokýrorǵa qaitarý týraly sheshim shyǵardy», - dep habarlady oblystyq sottyń baspasóz qyzmetinen.
Eske salaiyq, «Ohotzooprom» inspektory Erlan Nurǵalievtiń ólimi týraly is boiynsha jeti adam aiyptalyp otyr. Olardyń úsheýi qamaýǵa alyndy.
Esterińizge sala ketsek, osydan birneshe ai buryn buryn 5 kiik atqan brakonerlermen qaqtyǵysta aýyr jaraqat alǵan «Ohotzooprom» ÓB» RMQK inspektory Erlan Nurǵaliev 15 qańtarda Astananyń №1 aýrýhanasynda qaitys bolǵan edi.
