Parlament Senatynyń jalpy otyrysynda «2005 jylǵy 25 qarashadaǵy Táýelsiz Memleketter Dostastyǵyna qatysýshy memleketterdiń avtokólik quraldaryn jymqyrýǵa qarsy kúrestegi jáne olardy qaitarýdy qamtamasyz etýdegi yntymaqtastyǵy týraly kelisimge ózgerister engizý týraly hattamany ratifikatsiialaý týraly» Zańy qabyldandy, dep habarlaidy "Ult aqparat".
Bul hattamaǵa 6 eldiń ishki ister ministrleri qol qoidy, olardyń arasynda Resei, Tájikstan, Belarýs, Qazaqstan, Qyrǵyzstan, Moldova bar.
Hattamanyń negizgi maqsaty – urlanǵan avtokólik ieleriniń quqyqtaryn qorǵaý.
«Búginde TMD kelisimine sáikes, eldermen shekaramyz ashyq. Osyny paidalanyp, keibir adamdar zań buzýshylyqtar jasaidy. Mysyly, 2005 jyldan bastap osy kezge deiin urlanǵan 223-dan astam kóliktiń tek 30 paiyzy elge qaitarylǵan. Óitkeni, suraý salý normalarynyń kemshilikteri bar. Osy kemshilikterdi joiý úshin qujatqa jańa normalar engizildi. Endi ereje boiynsha suraý salýdy oryndaýǵa bir ai ýaqyt beriledi. Sondai-aq, suraý salý boiynsha aqparat usynýdan bas tartý úshin naqty negiz qajet», - dedi QR Ishki ister ministri Erlan Turǵymbaev.
Sonymen qatar, Hattamada:
- jol-kólik, órt jáne tabiǵi apattan zardap shekken avtokólikter týraly málimet berý;
- keden organdarymen aqparat almasý;
- 1 jyl ishinde suraýy joq avtokólik, qai jerde anyqtalsa, sol memlekettiń menshiginde qaldyrý máseleleri qarastyrylǵan.
«Búginde Táýelsiz Memleketter Dostastyq elderiniń arasynda avtokólikterdi urlaý problema bolyp tur. Osy Kelisimdi bekitý - azamattardyń quqyǵyn qorǵap, urlanǵan kólikterdi qaitarýdyń jolyn jeńildetedi. Osy Zańdy qabyldaý teris áleýmettik-ekonomikalyq jáne quqyqtyq saldarǵa ákep soqpaidy, qosymsha qarjy talap etpeidi», - dedi ministr.
