QR DSM Qoǵamdyq densaýlyq saqtaý ulttyq ortalyǵynyń «Sanitariialyq - epidemiologiialyq saraptama jáne monitoring ǵylymi- praktikalyq ortalyǵy» filialy direktorynyń mindetin atqarýshy Manar Smaǵul koronavirýstyń jańa shtamdarynyń erekshelikteri jaiynda aitty, dep habarlaidy QazAqparat.
Ortalyq kommýnikatsiialar qyzmetindegi baspasóz máslihaty barysynda ol britandyq shtamm álemniń 125 elinde anyqtalǵanyn atap ótti. Onyń aitýynsha, bir apta ishinde britan shtamy anyqtalǵan elderdiń qatary 7 esege artyp otyr. Munan bólek ońtústikafrikalyq shtamm 75 elde, braziliialyq shtamm 41 elde tirkelgen.
«Virýstyń mýtatsiiaǵa ushyraý yqtimaldyǵy juqtyrǵan adamdar jiiliginiń artýyna bailanysty ósip keledi. Jańa mýtatsiianyń anyqtalǵan sanyn, jalpy SARS-CoV-2 taralýyn qysqartý úshin virýstyń aldyn alatyn barlyq qajetti is-sharalardy qabyldaýymyz qajet. Oǵan Densaýlyq saqtaý ministrligi keńes beretin barlyq is-sharamen qatar COVID-19-ǵa qarsy vaktsinatsiialaý da kiredi. Koronavirýspen aýyrǵan adamdardyń kópshiliginde eshqandai simptom bolmaýy múmkin. Soǵan bailanysty onda qandai shtamm bolsa, onda ol adamdarǵa juqtyrýshy bolýy yqtimal. Sizdiń koronavirýs nemese basqa shtamdy juqtyryp alǵanyńyzdy bildiretin birde bir simptom joq bolady. Sondyqtan koronavirýs juqtyrý alý táýekeliniń joǵary ekendigine kúdik keltirseńiz, onda ózińizdi oqshaýlaýǵa jáne test tapsyrýǵa keńes beremiz», - dedi ol.
Sonymen qatar sarapshy koronavirýstyń jańa shtamdarynda SARS-CoV-2-dei simptomdardyń bolatyndyǵyn da atap ótti.
«Bul - dene qyzýy, jótel, dám ne iis sezýden qalý. Biraq, Ulybritaniia mamandarynyń málimetinshe, britandyq shtamǵa jótel, qatty sharshaý jáne bulshyq etterdiń aýrýy syndy simptom tán. Al dám men iis sezýdiń joǵalýy onsha biline bermeidi. Jótel bolǵan kezde koronavirýstyń juqtyryp alý yqtimaldyǵy bar ekendigin joqqa shyǵarýǵa bolmaidy. Jańa shtamdardyń taǵy bir ereksheligi – reprodýktivtiliginiń, adamdarǵa juǵý kórsetkishiniń joǵary bolýy», - dedi Manar Smaǵul.
