Koronavirýstyń taralýyn barynsha báseńdetý úshin qajetti sharalardy der kezinde qabyldadyq. Búgin Tótenshe jaǵdai rejimin qamtamasyz etý jónindegi memlekettik komissiianyń kezekti otyrysynda Prezident Qasym-Jomart Toqaev osylai dedi, dep habarlaidy "Ult aqparat".
«Biz koronavirýstyń taralýyn barynsha báseńdetý úshin qajetti sharalardy der kezinde qabyldadyq. Men 15 naýryzda alǵashqy naýqastar belgili bolǵan sátten bastap tótenshe jaǵdai jariialadym. Birden eki iri qalamyzda karantin rejimi engizildi. Shyn máninde, qazir – búkil álem jurtshylyǵy úshin syn-qaterge toly ýaqyt. Osyndai kúrdeli kezeńde Elbasymyz arnaiy maqala jariialady. Bul – halqymyzdyń eńsesin kóteretin óte mazmundy, mańyzdy úndeý. Bereke-birliktiń arqasynda Qazaqstan bul indetti artqa tastap, zor senimmen alǵa basatyny aiqyn. Búginde biz ýaqytynda júzege asqan shuǵyl sharalardyń arqasynda indettiń keń taralýyna jol bermedik. Muny halyqaralyq qoǵamdastyq oń baǵalap otyr», - dedi Q.Toqaev.
Memleket basshysy atap ótkendei, elimizde tótenshe jaǵdaidyń jariialanýyna bailanysty daǵdarysqa qarsy sharalar iske asyrylýda.
«Turǵyndarǵa jáne bizneske qoldaý kórsetý maqsatynda daǵdarysqa qarsy naqty sharalar qabyldadyq. Azamattarymyzǵa kómektesý úshin buryn-sońdy bolmaǵan kólemde qyrýar qarjy bólindi. Kóptegen memleketter halqyna osyndai qoldaý kórsete alǵan joq. Úkimet sol qarajattyń sapaly ári maqsatqa sai jumsalýyn qadaǵalaýy tiis. Tótenshe jaǵdai kezindegi eń mańyzdy mindetterdiń biri – azyq-túlik qaýipsizdigin qamtamasyz etý. Sondyqtan áleýmettik mańyzy bar azyq-túliktiń shekti baǵasy belgilendi. Qazir kóktemgi egis naýqany bastaldy. Bul – óte mańyzdy jumys. Sondyqtan, Úkimet jáne ákimdikter osy jumysty erekshe nazarda ustaýy qajet», - dedi Prezident.
Aita keteiik, Memleket basshysy eldegi tótenshe jaǵdai rejimin sáýir aiynyń sońyna deiin sozý qajettigin jáne úsh megapolis pen óńirlerdegi karantindi jalǵastyrýdy tapsyrdy.
