Koronavirýstyń jańa tolqynynda 162 myń adam jumyssyz qalýy múmkin. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«COVID indetiniń eńbek naryǵy úshin qateri men teris áseri áli de bar. Eger koronavirýstyń ekinshi tolqyny kelip jatsa jáne qatań shekteý sharalary qabyldansa, onda bizdiń baǵalaýymyzsha 2,2 mln-nan astam adam qoldaýǵa muqtaj bolýy múmkin. Osy jaǵdaida boljam boiynsha jumyspen qamtylǵan halyqtyń jartysyna jýyǵy nemese 4 mln adam jumysyn saqtap qalady», - dedi ministr Májilistegi Úkimet saǵatynda.
Onyń dereginshe, negizinen aýyl sharýashylyǵy, qurylys, óndiris jáne densaýlyq saqtaý salalarynda eńbek etetin adamdar jumysyn saqtap qalady.
«Úshten biri nemese 2,5 mln adam qashyqtan oryndalatyn jumys rejimine aýysýy múmkin. 2 mln adamnyń jumys ýaqyty qysqaryp, olar aqyly nemese basym bóligi aqysyz demalysqa shyǵarylýy yqtimal. Bul - birinshi kezekte saýda, kólik, tutyný jáne tamaqtaný qyzmetteri salasyndaǵy qyzmetkerler. Baǵalaý boiynsha 162 myń adam jumyssyz qalýy múmkin», - dedi ministr.
