Koronavirýstyń jyldam juǵatyn túri - "Delta" tarap jatqan shaqta Ońtústik Afrika jáne Aziia-Tynyq muhit aimaǵynda karantin kúsheidi. Eýropanyń kóptegen eli men AQSh-ta vaktsinalaý naýqany indettiń betin qaitarǵanmen koronavirýstyń "Delta" varianty mamandardy alańdatyp otyr.
Sidneide milliondaǵan turǵyn 27 maýsymda eki apta lokdaýnǵa jiberildi. Indoneziiada buryn-sońdy bolmaǵan koronavirýstyń joǵary kórsetkishi (bir kúnde 21 myńnan astam naýqas) tirkeldi. Djakarta men ózge qalalardaǵy aýrýhanalarda oryn tapshy. Malaiziiada da lokdaýn merzimi uzartyldy, elde koronavirýs juqtyrǵandar áli de kóp jáne turǵyndardyń 6 paiyzy ǵana vaktsina alǵan.
28 maýsymnan bastap Tailandta qoǵamdyq tamaqtaný oryndary jáne qurylys nysandarynda shekteý kúshine enedi, Bangokta adamdardyń bir jerge jinalýyna tyiym salynǵan. Bangladesh te 28 maýsymnan bastap jalpyulttyq lokdaýn engizetinin habarlady.
Al Liýksembýrg premer-ministri Havier Bettel keńsesi premerden koronavirýs anyqtalǵanyn habarlady. Ol birneshe kún buryn Eýroodaq sammitine qatysqan. Ońtústik Afrika ishimdik saýdasyn tyiyp, adamdardyń bir orynǵa jinalýyna tyiym saldy, túngi komendanttyq saǵat merzimin uzartty.
