Qytaida koronavirýs indeti basyla bastaǵanyna qaramastan, búgin eldiń Densaýlyq saqtaý isteri jónindegi memlekettik komiteti QHR basshylyǵy úshin mańyzdy mindetterdiń biri osy virýstyń shet elderge taralýyn boldyrmaý ekenin málimdedi.
Osy aptada QHR Memlekettik keńesi janyndaǵy indetpen kúres boiynsha basqarýshy toptyń kezekti otyrysynyń qortyndysy boiynsha, shetelderde koronavirýstyń tez taralýyna bailanysty sheteldikter kóp keletin Beijiń sekildi iri megapolisterge kelý qaýipsizdigin qamtamasyz etý sharalaryn kúsheitý kórsetilgen.
Sondai-aq sońǵy táýlikte Qytaidyń qurly bóliginde tirkelgen koronavirýs infektsiiasyn juqtyrýdyń 15 jańa rastalǵan jaǵdaiynyń altaýy syrttan kelgenderge qatysty, delingen QHR Densaýlyq saqtaý isteri jónindegi memlekettik komitetiniń habarlamasynda. Jalpy, qazirgi ýaqytta virýsty syrttan juqtyrýdyń jalpy sany 85-ke jetti.
Qytaidyń megapolisterinde tótenshe jaǵdaiǵa qarsy áreket etýdiń eń joǵary deńgeii alynyp tastalmaidy
QHR-dyń 24 ákimshilik-aýmaqtyq bólinisinde halyqtyń densaýlyǵyna bailanysty tótenshe jaǵdailarǵa den qoiý deńgeii tómendetilse de Beijiń, Shanhai, Tiantszin siiaqty megapolisterinde eń joǵary deńgeide qala beredi.
Jergilikti BAQ-tyń habarlaýynsha, Beijińge halyqaralyq reistermen keletin jolaýshylar 11 naýryzdan bastap 14 kúnge karantinge jatqyzylýy kerek. Bul shara sheteldikterge de, Qytai azamattaryna da qatysty.
Sonymen qatar, Beijińge az ýaqytqa issaparmen kelgen jolaýshylar qatań belgilengen qonaq úilerde qalyp, koronavirýsqa tekserýden ótýi tiis. Koronavirýs testiniń teris nátijesi belgili bolǵan soń ǵana atalǵan sanattaǵy adamdar el astanasynda erkin júre alady.
Koronavirýstyń taralýyn baqylaýdaǵy Beijiń tájiribesi
Qytaida koronavirýstyń kúrt taralýy kezinde, qańtar aiynyń sońynda– aqpan aiynyń basynda, Beijiń biligi el astanasyn oqshaýlamady. Qala mańynda jáne Beijińdegi aýdandarda jergilikti turǵyndar men basqa qalalardan kelgenderge jáne sheteldikterge sanitarlyq baqylaý sharalaryn kúsheitti.
Mysaly, astanalyq Chaoian aýdanynyń Heichjýanhý qalalyq kentinde (halyq sany 74 myń adam) Beijińniń tarihi ortalyǵynan shyǵysqa qarai TJ-ǵa den qoiýdyń eń joǵary deńgeii engizilgen sátten bastap munda koronavirýs infektsiiasyn juqtyrýdyń birde-bir rastalǵan nemese kúdikti oqiǵasy anyqtalǵan joq.
«QazAqparat» HAA tilshisine bergen suhbatynda atalǵan kent basshysynyń orynbasary Tian He Heichjýanhada qatań ótkizý rejimi men arnaiy tirkeý júiesin engizýdiń arqasynda ǵana koronavirýstyń taralýyna jol bermeý múmkin bolǵanyn aitty.
Kentte 38 ótkizý pýnkti ornatyldy, onda jergilikti turǵyn úi-kommýnaldyq sharýashylyq qyzmetkerleri 24/7 rejiminde kentke kiretin adamdardyń dene qyzýyn ólsheidi jáne olardyń arnaiy ruqsatnamalaryn tekseredi. Ruqsat etilmegender qalaǵa kirgizilmeidi.
