Adam ómirine arasha túsip, 24 saǵat 24 minýttai zyryldap ótip jatqanda sharshaǵanyń da bilinbeidi. Koronavirýspen kúresip júrgen dáriger-infektsionist Baianbek Aspandiiarov osylai deidi, dep habarlaidy "Ult aqparat" Ortalyq Qazaqstan gazetine silteme jasap.
Dáriger-infektsionist, Qaraǵandy oblystyq klinikalyq aýrýhanasy infektsiia bóliminiń meńgerýshisi Baianbek Aspandiiarov aýrýhanadan shyqpai jumys istegeli on táýlikke jaqyndapty.
«Kúnniń atqany, keshtiń batqany, tipti, aptanyń qai kúni ekenin aiyrýdan qalǵaly qashan?! Virýs juqtyrǵan naýqastardyń janyndaǵy meditsina qyzmetkerleri úshin minýt, saǵat, kún, apta uǵymdary joǵalǵandai. Basty esebimiz – syrqattan jazylýǵa bet alǵandar men jazylyp shyqqandar. Otbasymdy kórmegeli de bir aidan asypty. Bastapqyda provizorlyq aýrýhanada bolǵandyqtan, zaiybym men eki sábiime aýrý juqtyryp alýdan seskenip, aýylǵa, ata-anama jibergenmin. Qolym qalt etkende habarlasyp, balalarymnyń «áke» degen tátti daýysyn estigende táýlik boiy aýa ótpeitin arnaiy kiimmen júrgeniń umytylyp, ár naýqas úshin shyrqyrai qinalǵan jan azabyń bir sátte seiilip júre beredi», - deidi aq halatty abzal jan.
Aitýynsha, ol ózi úshin de, tipti, naýqastar úshin de qoryqpaidy. Sebebi, dárigerlerge barlyq jaǵdai jasalǵan, virýs juqtyrǵandar da qatań baqylaýda. Tek halyq karantin rejiminiń talabyn saqtamai, dert juqtyrýshylar qatary arta túspese eken degen oi maza bermeidi.
«Karantin uzap ketse, otbasymmen qaýyshar kúnniń, balalarymdy baýyryma basyp, meiirim qanǵansha iiskeitin sáttiń de alystai túsetinin oilasam, kóńilim bult torlaǵan aspandai bolady. Jabyqqan kóńil shirkin jazylýǵa bet alǵan naýqastardy kórgende, kún-tún demei, jantalasqan eńbegińniń esh ketpegenin sezgende serpilip qalady. Adam ómirine arasha túsip, 24 saǵat 24 minýttai zyryldap ótip jatqanda sharshaǵanyń da bilinbeidi. Táýliktik aýysymnan keiin sál kóz shyrymyn alyp, qaitadan jumysqa kirisemiz», - dep atap ótti Baianbek Aspandiiarov.
Dárigerdiń sózine sensek, ájesi bala kúninen «dáriger – qurmetti mamandyq» dep qulaǵyna quiyp otyrǵan. Dál qazirgi sátte ol osynaý mamandyqty tańdaǵanyna dán riza.
«Keide tipti ata-anammen, jarymmen, balalarymmen habarlasýǵa da múmkindik bolmai qalady. Olardyń da, búkil qazaq eliniń de tileýimizdi tilep otyrǵanyn ishtei sezemiz. Oraiy túskende «Ortalyq Qazaqstan» gazeti arqyly otbasyma sálem joldasam deimin. Habarlasa almai jatqan sátterimde olardyń alańdamaýyn ótinemin. Eń bastysy, keler kúnderdiń mamyrajai bolýy. Al, meniń qazirgi mindetim – kózge kórinbeitin qaýipti «jaýmen» betpe-bet shaiqasta jeńiske jetý!», - deidi dáriger.
