Densaýlyq saqtaý vitse-ministri Liýdmila Biýrabekova koronavirýs infektsiiasy boiynsha úiinde emdelip jatqan patsientter tegin ala alatyn dári-dármek túrlerin atady, dep habarlaidy QazAqparat.
«COVID-19 – jańa koronavirýs infektsiiasy birneshe aidyń ishinde bizdiń ómirimizdi túbirimen ózgertip jiberdi. Óz-ózimizdi oqshaýlaýǵa, tazalyq erejelerin qatań saqtaýǵa úirendik. Ózimizdiń boiymyzdaǵy aýrý belgilerine jiti mán berip, qashyqtyqty saqtap, aýrý belgisi joq bolǵan jaǵdaida da ózge bireýdi juqtyryp alýymyz múmkin ekenin sezinip, basqa adamdar aldyndaǵy jaýapkershilikke túisine bastadyq», - dep jazady vitse-ministr Facebook paraqshasynda.
Vitse-ministr sondai-aq azamattar óz densaýlyǵyna basa mán bere bastaǵanyn jetkizdi. Sebebi aýrýdyń qalai ótetinin dóp basyp boljaý qiyn.
«Aýrý kóbinese jeńil jáne ortasha jaǵdaida ótkenimen aýrýdyń jeńil ótip, kúrdeli jaǵdai bolyp ketpeýi úshin aǵzany medikamentozben qoldap otyrý kerek. QR Densaýlyq saqtaý ministrliginiń sapa men meditsinalyq qyzmet boiynsha birikken komissiiasy KVI-dy diagnostikalaý men emdeý hattamasyna aýrýdy ambýlatoriialyq deńgeide ótkeretin patsientter úshin 5 preparat engizdi. Bul qabynýǵa qarsy preparattar - Paratsetamol men Ibýprofen, Rivaroksaban, Apiksaban men Dabigatran sekildi antikoagýlianttar», - deidi ol.
Azamattar ambýlatoriialyq deńgeide bul preparatty tegin alýy úshin birqatar normativti qujatqa ózgerister engizilgen. Atalmysh preparattar ambýlatoriialyq deńgeide tegin beriletin dári-dármekter tizimine, (QR DSM №666 buiryǵy), Biryńǵai distribiýtordan satyp alynatyn dárilik preparattardyń tizimine kirgen.
«Qazirgi ýaqytta koronavirýs infektsiiasynan emdeý úshin túpnusqadaǵy Baier (Rivaroksaban) kompaniiasynyń Ksarelto, Pfaizer (Apiksaban) kompaniiasynyń Elikvis, Beringer Ingelhaim (Dabigatran) kompaniiasynyń Pradaks antikoagýliantyn satyp alý boiynsha óndirýshimen kelisssózder júrgizilýde», - dep habarlaidy Liýdmila Biýrabekova.
Óńirlerdiń bári de bul kúnde osy preparatty alý úshin ótinim berip qoiǵan. Búgingi tańda Biryńǵai distribiýtor satyp alý protsedýrasyn júrgizýde. 10 kúnnen keiin preparattar ambýlatoriialyq deńgeide KVI-dan emdelip jatqan patsientter úshin qoljetimdi bolady. Liýdmila Biýrabekovanyń aitýynsha, naýqastar bul preparattardy turǵylyqty jerde tirkelgen emhanasynan koronavirýs infektsiiasy rastalǵan jaǵdaida jáne tek dárigerdiń taǵaiyndaýymen ala alady.
«Eger patsientke atalǵan preparattardyń berilmeitini habarlansa, olar Biryńǵai distribiýtordyń 1439 bailanys ortalyǵyna habarlasa alady. Operatorlar máseleniń baiybyna baryp, dári-dármekpen qamtý sharýasyn sheship beredi», - deidi ol.
