QR DSM Ulttyq Qoǵamdyq densaýlyq saqtaý ortalyǵy Sanitarlyq-epidemiologiialyq saraptama jáne monitoring ǵylymi-praktikalyq ortalyǵy direktorynyń orynbasary Manar Smaǵul vaktsinanyń koronavirýspen kúrestegi rólin túsindirdi, dep habarlaidy QazAqparat.
«Vaktsina týraly aitqanda, onyń meditsinanyń eń úlken jetistigi ekenin atap ótken jón. Qazirgi ýaqytta vaktsinalar juqpaly aýrýlarǵa qarsy eń tiimdi qorǵanys sharasy bolyp sanalady. Vaktsinalaý arqyly sheshek siiaqty aýrýlar joiyldy. Vaktsinanyń tiimdiligi men jetistikteri týraly tolassyz aitýǵa bolady. Múmkindigi men áleýeti bar barlyq elder kúsh-jigerin koronavirýsqa qarsy vaktsina jasaýǵa baǵyttady. Karantin jaǵdaiynda turyp jatqanymyzǵa on ai boldy. Al vaktsina qozǵalys, qarym-qatynas erkindigin beredi. Sonyń arqasynda koronavirýstyń taralýyna kedergi keltiremiz dep úmittenemin», - dedi sarapshy Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, vaktsina qanshalyqty tez daiyndalsa da, ony ázirleýge jáne óndirýge óte joǵary talaptar qoiylǵan.
«Vaktsinanyń sapasyna qoiylatyn bul talaptar eshqashan ózgermeidi, olar barlyq senimdilik deńgeiine sáikes kelýi kerek. Vaktsina jappai paidalanýǵa berilse, demek ol barlyq qaýipsizdik talaptaryna jáne álemdik standarttarǵa sai keledi. Vaktsinanyń sapasyna senýge bolady», - deidi M. Smaǵul.
Eske salsaq, buǵan deiin Qazaqstanda koronavirýsqa qarsy vaktsina 1 aqpannan bastap egiletindigi habarlandy.
Sonymen qatar 18 jasqa tolmaǵan balalar men 65 jastan asqan adamdarǵa vaktsinanyń tiimdiligi men qaýipsizdigi týraly málimet joq, sondyqtan bul jastaǵylarǵa ekpe salynbaidy. Al Úkimet otyrysynda Prezident Qasym-Jomart Toqaev ákimderge vaktsinatsiia máselesinde dúrbeleńge jol bermeýdi tapsyrdy.
