QR Ortalyq kommýnikatsiialar qyzmetinde ótken «Biz Birgemiz» onlain-forýmynda koronavirýs pandemiiasymen kúreste erekshe kózge túsken azamattar «Halyq alǵysy» medalimen marapattaldy, dep habarlaidy QazAqparat.
Densaýlyq saqtaý, bilim berý, áleýmettik qorǵaý jáne pandemiia men kúreste eleýli eńbek etip, jemisti jumys istegeni úshin respýblika boiynsha túrli salanyń 343 mamany marapattalady. Olardyń arasynda 60 dáriger, 39 politsei, 30 áskeri qyzmetshi, 41 volonter, 34 metsenat, 38 mádeniet jáne bilim ókili, 25 BAQ qyzmetkeri bar.
Marapatty QR Prezidenti Ákimshiligi Basshysynyń birinshi orynbasary Dáýren Abaev, QR Aqparat jáne qoǵamdyq damý ministri Aida Balaeva, QR Densaýlyq saqtaý ministri mindetin atqarýshy Aleksei Tsoi, QR Ishki ister ministriniń orynbasary Aleksei Kalaichidi jáne QR Memlekettik qyzmet isteri agenttigiń tóraǵasy Anar Jaiylǵanova tabystady.
«Osy sahnada ózimniń eńbek jolymdy eske aldym. Kardiohirýrgiiadaǵy 15 jylda qýanyshty jáne qaiǵyly sátter boldy. Biraq, dál búgingidei qaterli pandemiia saldaryn kórmedik. Bul koronavirýstyń ereksheligi – balalarymyz ben ata-analarymyzǵa zaqym keltirip jatyr. Búgin tańerteń óz áriptesime jansaqtaý júiesin ornattym. Bul óte qorqynyshty. Bizdiń únemi jumysta bolyp, otbasymyzdan jyraqta júrgenimiz úshin emes, virýstyń shekaraǵa baǵynbaityny qorqynyshty. Baqytymyzǵa orai, naýqastardyń kórer jaryǵy bar nemese úmitsiz dep bólip jatqan joqpyz. Barlyǵyn birdei emdeýge tyrysýdamyz», - dedi Ulttyq ǵylymi kardiohirýrgiia ortalyǵy bólimshesiniń basshysy Timýr Lesbekov marapattaý rásiminde.
Dárigerdiń aitýynsha, koronavirýspen kúres arqyly edáýir tájiribe men qural-jabdyqtar jinaqtaldy jáne eń bastysy – virýsty jeńý múmkindigi bar.
«Munda bir ǵana dárigerlerdiń eńbegi jetkiliksiz. Tutas halyqtyń birigýi mańyzdy. Koronavirýspen kúres – ár adamnyń mindeti. Osylai ǵana qaterli aýrýdy jeńe alamyz. Búgingi marapat úshin, azamattarymyzdy qorǵaý múmkindigi úshin shyn júrekten qýanyshtymyn», - dedi dáriger.
Marapattaý rásimine QR Prezidenti Qasym-Jomart Toqaev jáne barlyq óńirlerdegi medal iegerleri onlain qatysty.
Elordada Ulttyq ǵylymi kardiohirýrgiia ortalyǵy bólimshesiniń basshysy Timýr Lesbekov, «Nomad MMA» respýblikalyq federatsiiasynyń prezidenti Gadji Gadjiev, Ulttyq volonterler jelisiniń tóraǵasy Vera Kim, Meiirimdiler klýbynyń jetekshisi Gúlmira Ábdirasheva, metsenat, qoǵam qairatkeri Oralbek Botbai, Biologiialyq qaýipsizdik máselleri ǵylymi-zertteý institýtynyń bas direktory Kúnsulý Zakariia, Bas áskeri klinikalyq gospitaldiń neirohirýrg dárigeri Erjan Rysqaliev, Nur-Sultan qalasy Politsiia departamentiniń inspektory Artýr Botabekov, elordalyq volonter Abzalbek Sultanbek, ǵalym, kásipker Ámir Qýat jáne «Jas Otan» jastar qanatynyń sarapshysy Aian Hafiz marapat aldy.
