Qaýipsizdik Keńesiniń Apparatynda Qarjy ministri E.Q.Jamaýbaevtyń jáne Qarjy monitoringi komitetiniń tóraǵasy J.Q.Elimanovtyń qatysýymen ekonomikalyq qaýipsizdikti qamtamasyz etý máseleleri boiynsha keńes ótti, dep habarlaidy "Ult aqparat" Aqordaǵa silteme jasap.
Memleket basshysynyń koronavirýs infektsiiasymen kúresýge bólingen biýdjet qarajatynyń maqsatty jáne utymdy paidalanylýyn baqylaýdy qamtamasyz etý, dárilik zattar men meditsinalyq buiymdardyń zańsyz ainalymynyń jolyn kesý, sondai-aq, qarjy piramidalaryna qarsy kúres jónindegi tapsyrmalaryn iske asyrýǵa erekshe nazar aýdaryldy.
Júrgizilgen tekserýlerdiń nátijeleri boiynsha zańsyz ainalymnan 9,6 mln astam meditsinalyq betperdeler, 65 myń litr antiseptik, 819 mln teńge somadaǵy túrli dárilik preparattardyń 388,2 myńnan astam oramasy alynyp, aýmaqtyq densaýlyq saqtaý organdaryna berildi.
Budan basqa, Qaýipsizdik Keńesi Tóraǵasynyń kóleńkeli ekonomikaǵa qarsy kúrestiń keshendi tásilin uiymdastyrý jáne kóleńkeli ainalymdy qysqartý jónindegi tapsyrmasyn oryndaý máselesi qaraldy.
Osylaisha, kóleńkeli ekonomikaǵa qarsy is-qimyl sheńberinde jalǵan shot-faktýralardy jazyp berý faktileri boiynsha anyqtalǵan qylmystardyń sany 2,5 esege artty (2019 jyldyń 6 aiynda 94-ten aǵymdaǵy jyldyń uqsas kezeńinde 242-ge deiin).
Atalǵan saladaǵy qylmystyń uiymdasqan túrlerimen kúres boiynsha belsendi jumys jalǵasýda. Mysaly Atyraý oblysynda sotqa uiymdasqan qylmystyq topqa qatysty qylmystyq is jiberildi, olar 1,8 mlrd teńgege jalǵan shot-faktýra shyǵarǵan.
Qabyldanǵan sharalardyń, onyń ishinde zańnamalyq sipattaǵy is-áreketterdiń nátijesinde qarajatty qolma-qol aqshaǵa ainaldyrý somasy bes jylda alǵash ret 36%-ǵa tómendedi.
Jumystyń taǵy bir mańyzdy baǵyty memleketke keltirilgen ekonomikalyq zalaldy óteý bolyp tabylady. Birinshi jartyjyldyqta Qarjy monitoringi komiteti 743 qylmystyq isti tergedi, onyń 560-y máni boiynsha sotqa qaraýǵa joldandy.
Osy qylmystyq ister boiynsha anyqtalǵan zalal somasy 38,4 mlrd. teńgeni qurady, onyń shamamen 32 mlrd teńgesi memleketke keltirilgen zalal. Memleket kirisine 21,1 mlrd teńge óteldi, 9,6 mlrd teńgelik múlikke tyiym salyndy.
Taǵy bir basty baǵyt – qarjy piramidalarymen (29 qylmystyq is tirkelgen), zańsyz oiyn mekemelerimen (117 qylmystyq is, 160 oryn joiylǵan), sondai-aq, jalǵan aqsha jasaýmen (161 is) kúres máselesi.
Sonymen qatar óz qatarlarynda sybailas jemqorlyq kórinisteriniń jolyn kesý boiynsha jumys ózekti bolýda, ony turaqty formatta júrgizý qajet.
Keńes qorytyndysy boiynsha Prezidentiniń kómekshisi – Qaýipsizdik Keńesiniń hatshysy Á.Ó.Isekeshev eldegi qalyptasqan áleýmettik-ekonomikalyq ahýal jaǵdaiynda el basshylyǵynyń joǵaryda atalǵan tapsyrmalaryn iske asyrýdy erekshe baqylaýǵa alý qajettigin, bul rette adal kásipkerlerdiń quqyqtary men zańdy múddeleriniń qatań saqtalýyn qamtamasyz etý qajettigin atap ótti.
